以前《塊魂》曾令唔少PS2機迷大吃一驚，因為遊戲界甚少出現咁可愛抵死的畫風，兼且玩法夠創新，好快就成為機迷最希望推出續作嘅新崛起系列。但當大家都認為全新一集PS3《美麗塊魂》實食冇黐牙之際，有邊個估到佢一個屈尾十跳槽去Xbox360，仲成為微軟呢個月聲言力谷嘅重點大作，想上網同其他高手鬥碌得勁，仲唔嗱嗱聲出機喇喂！
撰文：陳福榮
老竇出馬冇甩拖
喺自稱「充滿浪漫與漂亮」嘅呢一集裏面，竟然連德高望重嘅父王都可以碌餐飽，平時受慣佢氣今次仲唔報仇咁報？事關呢個系列，都係由父王設計各式各樣嘅考驗畀小王子，到今集就更變本加厲，為咗激發起囝囝嘅鬥志，一國之君都唔介意出嚟癲番下，真係要講句父愛真偉大。個玩法亦相當搞鬼，起初唔知點解父王會變咗做蘇蝦，慢慢碌將佢由直徑幾cm變到幾m甚至幾十m，咁佢就會逐步經歷細蚊仔到青年嘅外形變化。到底能唔能夠變番原本個樣，要睇吓乖仔生唔生性咯！
上網樂趣多到暈
遊戲正章以外，最有可觀性固然係畀玩家聚腳嘅網上Lobby，就算唔開局互揪或者二人合作，都可以玩啲小遊戲。另外假如喺比賽勝出，就會獲得國王讚賞，及拎到象徵勝利嘅曲奇餅，食得越多自然網上排名就會越高。
另一方面，只要達成特定條件就可開啓兩個新版面，分別為追加模式「揀食」和「永遠」，前者要喺最短時間將個波整到又靚又大嚿，至於「永遠」則冇時間限制，但要碌勻所有物件。由於任何一版都可以玩到呢兩種模式，所以變相大幅延長遊戲的壽命，好襟玩！
單撈任務有排玩
基於XB360最強係網絡元素，因此廠方喺推出當日以及一星期後，火速推出合共7種唔同收費嘅下載服務，每個約200至300M.P.（約$20-30）。呢批任務可謂補充番既有內容嘅不足，一般要求唔太高嘅朋友，單憑DVD入面嗰啲嘢應該收晒貨，但對於玩爆晒咁多集嘅資深老手，單撈反正唔太貴，當然追加任務係多多益善啦！
首批送掛繩
心水清嘅機迷應該留意到，早排有兩隻NDS高達遊戲已經由CapcomAsia負責引入。如今絕大部份NamcoBandai嘅XB360同NDS遊戲，只要冇「拉臣」理論上都會造到行貨，今次《美麗塊魂》仲拍心口話返足日本原裝贈品，送埋嗰條勁搞笑嘅父王掛繩，而且遊戲光碟更保證百分百日本進口，想用靚價買日版大家自己識Do啦!
機種：XB360
廠商：NamcoBandai
類型：ACT
人數：1-2人(網上2-4人)
推出日期：10月18日
價格：$288
查詢：CapcomAsia(23661001)
