黃家強的個人網頁上，嗜好一項有十大至愛，音樂排第一，烹飪竟然排第五，僅次於電影！以為是藝人的胡亂吹噓。但他自薦的示範菜式，有生炒糯米飯、獨門四杯雞、鮮蝦煮勝瓜湯菜、魚子蒸蛋白，難度9.5級！又以為他只想我們找大廚為他準備，誰知他一來便起鑊邊炒邊鬧：「點解今日冇基圍蝦㗎！冇膏海蝦煮勝瓜，唔夠味㗎！」
記者：廖秀娟
攝影：譚盈傑
場地提供：九龍灣龍德樓（27961228）
黃家強入廚履歷
年資：約25年。現時家中每星期有4天自家煮飯，由太太或他主理。
撚手菜：家常中菜包括南乳排骨、豆瓣醬肉片、各式創意BBQ食物及今天4款菜式。
與姐姐輪流煮飯
萬萬估不到！家強原來煮得兩味，「呢個菜用較多蝦做濃湯底，煮出嚟勝瓜有蝦鮮味，湯又有瓜的清甜。如果鮮蝦有膏，煮時橙色蝦膏流出湯面，賣相好啲，味道又會多一重蝦膏香。」
可惜當日買不到有膏的基圍蝦，家強笑罵：「咁我做得唔好嗰喎！不過有就最好，冇都唔緊要，當日有咩靚就用咩啦！煮餸應該係咁！」家強中學開始就跟姐姐輪流煮飯，「阿媽阿爸要返工，媽咪買好材料，我哋就負責煮。」經過幾年「實習」，家常小菜變成家常便飯，「𠵱家喺街見到好食的餸，大部份都可以自己煮到！」
最緊要五色齊全
與日籍太太結婚後，涉獵的菜式又更多，「太太好鍾意煮嘢食，但佢只識煮日本菜，仲會買食譜學煮，我就唔會，靠打天才波。」兒子出世後，對食物要求更高？「又唔會喎！我就係唔想太Protect，其實只要有五色食物，足夠碳水化合物、鈣同蔬菜已經好夠，我哋都有食多啲菜同魚，但就冇話特登食有機食物，不過每次洗亁淨啲就真嘅！
煮餸大測試
鮮蝦浸勝瓜湯菜
0hr20min
2人份量
雖然現場版是海蝦代替有膏基圍蝦，但湯仍然鮮味，「精髓是蝦要連殼煮，讓蝦殼為湯添味，而且蝦去殼煮會令蝦肉變嚡，所以千萬不要去殼呀！」家強教路。
材料
基圍蝦6隻、勝瓜1條、大葱/葱粒/蒜茸/紅葱頭/薑絲/指天椒粒各少許、糖/雞粉/紹酒各1茶匙、水1量杯
做法
1. 蝦洗淨，勝瓜洗淨切段。爆香蒜茸、葱粒、紅葱頭、指天椒粒及大葱段，下鮮蝦爆炒，再下薑絲，然後灒酒再兜炒。
2. 下水略煮蝦，再下勝瓜同煮，冚蓋煮約5分鐘，下雞粉及糖調味便可。
貼士
薑絲後下較好，因為易燶。蝦煮得太熟會韌，所以下水不能太多，要花時間煮滾。
阿強四杯雞
0hr30min
4人份量
傳統是三杯雞，黃家強煮的是四杯雞，「自細阿媽係用四杯㗎，多咗一杯蜜糖！」雞肉更加香甜，顏色又更蜜煉，煮時已經夠惹味。
材料
雞1隻、蒜片/洋葱/青椒/九層塔各少許
汁料：蜜糖/紹酒/麻油/老抽各1茶杯（150毫升）
做法
1.雞洗淨、去內臟、斬件。
2.起鑊爆炒蒜片、洋葱及青椒；下雞件一同兜炒一陣，下汁料炒勻所有材料。
3.直至煮至收汁，下九層塔，熄火冚蓋焗一陣，便可上碟或上煲仔。
貼士
如果有時間，雞全隻下鑊煮至完成才斬件，雞肉會更嫩滑；但煮時要不停為雞翻身，否則極易燶。
生炒糯米飯
0hr30min（未計浸糯米時間）
2人份量
材料
糯米1杯、臘腸1條、豬肉碎1両、冬菇/蝦米/瑤柱/花生/蒜茸/葱粒各少許、生抽/雞粉1茶匙、老抽11/2湯匙、雞蛋1隻
做法
1.糯米洗淨浸過夜。冬菇及瑤柱洗淨浸軟，冬菇切粒，蝦米及臘腸洗淨，後者切粒。雞蛋拂勻，煎成蛋角，切絲備用。
2. 起鑊爆香所有配料（除糯米及蛋絲）。
3. 下油起鑊，下糯米攤開兜炒，慢慢加水炒至水收亁，再重複步驟，至糯米近全熟，加入炒香配料兜炒，加生油、老抽及雞粉略炒後上碟，撒上蛋絲便成。
貼士
不想糯米太黏，可混粘米1/4杯同煮。生炒時逐少下水，否則糯米吸水太多變爛。
魚子蒸蛋白
0hr30min
2人份量
家強的仔仔已8個月大，可以吃糊仔，他想了這個蒸蛋白，加上魚子，便一家三口都可以吃了。
材料
蛋白6隻、雞湯1量杯、魚子11/2湯匙、蠔油2茶匙、鹽少許
做法
1.鑊內置高身碟，與冷水一起煲滾；蛋白拂勻，與鹽及雞湯拌勻，慢慢傾入已加熱的高身碟內蒸2分鐘，熄火後焗20分鐘。
2.開鑊蓋待蛋白稍凉，加上魚子，加幾滴蠔油點綴加味便成。
貼士
魚子易壞，不宜放上太熱的蛋白。
買定料明日教你煮餸
咖喱七色菜
意大利青瓜1隻、青紅黃燈籠椒各1/2隻、蘋果1個、香蕉1隻、蘆笋100克、鮑杏菇1隻、青咖喱1茶匙、椰漿2湯匙、日本咖喱汁100毫升、鮮百合2個、鮮羅勒1棵
左宗棠雞
嘉美雞1隻、竹葉青酒250毫升、芫荽1棵、蜜糖1湯匙
苦瓜炒牛柳
苦瓜2個、牛柳4両、豆豉2湯匙、蒜頭6粒
五色湯
番茄4個、粟米2支、甘笋2條、蜜棗/無花果各2粒、南北杏2両、豬𦟌1斤