全球最大網上交易平台「阿里巴巴」就嚟上市，報道話入場費大概6000蚊，今年預測市盈率79至94倍，好多散戶網友嫌貴。YYLAM713直指：「估值超貴，本嚟都諗住抽吓，𠵱家真係要諗一諗。」BoBOChan亦話：「食水咁深，冇得玩。」Cftria13就話：「開價太高，有掠水之嫌。」魚腩仔好同意：「招行（3968）增長咁勁，市盈率都冇成百倍咁高，風險又細過佢。」
開價高冇肉食
5Dollar更講：「都唔知係阿里巴巴，定四十大盜。」你估《一千零一夜》入面嘅阿里巴巴唔貪錢咩，唔貪錢點會咁夠膽吼四十大盜嘅寶藏喎。
CMC119指：「咁貴，又得嗰500股一手，抽到都冇肉食，借孖展抽分分鐘嘔凸。」咁一手黨短炒就要小心嘞。
不過，貴還貴，Don88覺得到時都會好多人走去抽，而且一大班富豪對投資阿里巴巴有信心，新地（016）郭氏兄弟、九倉（004）吳光正、同台灣首富郭台銘都話會入股，兼且雅虎（Yahoo）都係阿里巴巴其中一個大股東，話晒有大孖沙照喎。