近排政圈有種衰多口傳染病，染病嘅人會無端端hyper亂噏嘢然後再向公眾道歉。有辦你睇，自由黨主席田少鬧完周松崗唔提名佢愛將後就saysorry，冇耐又到煲呔喺電台節目度無厘頭將文革同民主扯上關係，激到唔少人紮紮跳，事後咪又要發聲明道歉囉。
田少學精咗
單睇道歉呢方面，八方覺得田少有誠意啲喇。事關佢肯親身喺傳媒前公開講，睇起上嚟都好似多啲悔意咁，唔似煲呔發張聲明就算。
八方同事噚日朝早去過煲呔母校香港華仁嘅教堂，希望煲呔可以親自同市民「耍冧」，點知等到11點都未見煲呔蹤影。八方希望佢只係去咗第二間教堂而令大家緣慳一面，而唔係因為要謝絕回應，連星期日參加彌撒咁重要嘅事都放棄啦。
田少噚日拒絕評論煲呔事件，睇怕都係學精咗，費事講多錯多。社民連就堅持唔會咁輕易放過煲呔，包括長毛在內嘅多名代表噚日由中環滙豐銀行遊行到禮賓府，抗議煲呔只係透過聲明收回言論，覺得煲呔非要親自向公眾道歉不可，其間仲燒咗煲呔照片同佢嘅道歉聲明，煲呔今次唔知點收科？