人怕出名豬怕肥，唔好以為立法會議員去選區議員勝算一定會大啲，其實好易成為人哋狙擊目標。好似喺黃大仙龍星選區競逐連任嘅公民黨譚香文Mandy咁，至少受到兩名男士挑戰。除咗左派支持嘅蔡六乘，仲有盧海鵬㖭。盧海鵬都去選議員？唔通想再掀起《歡樂今宵》嘅蝦仔爹哋熱潮？原來呢位盧海鵬唔係做演員嗰位，佢係31歲喺間證券行做理財顧問嘅盧海鵬，聲稱自己係獨立民主派，支持2012年雙普選。
有街坊向八方報料，話社民連暗地支持呢個𡃁仔出選，擺明向Mandy姐宣戰。Mandy就唔講咁多，費事衰多口又要繼田少同煲呔後公開道歉，只係話希望民主派可以團結喎。