外圍股市升勢持續，港股又有北水射住，形勢一片大好，迭連創出新高，股神李兆基語重心長，呼籲不要高追，只宜低買，即係後市仍係看好。事實上，現水平高追風險已越來越大，但有貨在手者，要繼續持有，務求在這個千載難逢的超級大牛市中，賺到盡。
風險有低高，分好多級，現時風險高，但可能只係去到「黃線」，同「紅線」仍有好大段距離，股價可以新高後再新高，大旺市可以再持續多一年半載，大賺錢機會在眼前，唔玩好可惜，但一定要揸實兩個宗旨，量力而為同嚴守止蝕。
現時入市，中資同國企股肯定係首先選取對象，家下直通車未開動，北水已源源而至，內地股民炒A股賺到盤滿缽滿，食髓知味，相對偏低的港股市，特別係「自己友」嘅股票，自然成為佢哋嘅新對象，相信「狩獵」行動仲會維持一段長時間，中資股升完可以再升。
未來業績有穩定增長
交通銀行（3328）升上11.80元高位後，上周五跟大市調整，最低落到10.78元，但反彈上11.46元收市，只跌0.32元，中資買盤仲係大手吸納，再破位而上，目標指向13.60元。
同A股相比，6家內地銀行H股俱有折讓，交行排在中位，折讓約23%，比招行（3968）的12%同工行（1398）的15%為吸引。
今年以來，除中信銀行（998）在4月底才上市外，5隻內銀股俱上升，升幅最大係招行，達131.2%，其次係建行（939）的57.1%及工行38.4%，最小係中國銀行（3988），只得10.8%，交行由9.33元升上11.46元，升幅22.8%，亦有追落後概念。
炒C輪7555博升45%
07年度（12月年結）上半年，交行淨利潤85.58億元，升41.83%，每股盈利0.18元，升38.46%，受5月發行A股攤薄影響。期內因應稅率變化而作出一次性稅項支出12.85億元，如不計此數，上半年盈利增長應有63.1%，下半年盈利表現會較佳，估計全年每股盈利0.40元，預測PE28.6倍，未來每年盈利估計會有20%至30%增長。
看好交行，可留意C輪7555，輪價0.31元，今年12月到期，實際槓桿率3.2倍，溢價只2.9%，升破0.33元後可向0.45元目標推進，上望空間有45%。