喺香港商界，有「吉士」嘅老總唔少，恒隆地產（101）主席朗尼陳啓宗係其中一位。佢每年都會喺集團嘅年報親自執筆寫主席報告，同股東用文字對話。上個禮拜五，恒隆出新年報，華華第一時間拜讀，朗尼除咗講吓自己喺大陸幾咁識得做生意，搞到大陸掀起「恒隆現象」（HangLungPhenomenon），個個抄佢之外，今年仲玩踢爆。踢乜嘢？
攞獎有助搶地皮
嗱，喺年報第10頁尾，有個括號寫咗一段說話：「本人在亞洲曾多次目睹有發展商於贊助某些國際商業雜誌舉辦的研討會後，隨即獲該等雜誌頒予此獎彼獎。吾等認為該等行為實乃弄虛作假，故拒絕參與其中。」佢話邊個？嘩，個個香港地產商都身家豐厚，點敢亂估，你鬧華華冇「吉士」都係咁話。
之不過，雖然朗尼拒絕參與其中，但就並唔代表恒隆冇獎攞，同埋佢唔想攞獎噃。
今年，陳啓宗就首次喺「管理層之討論及分析」度，新增得獎項目一欄，showoff一番。朗尼好老實咁話，啲獎好有實質用處，因為一般情況下，攞獎代表你夠料，而「超卓質量能確保集團之物業長期享有競爭能力，同時亦是一項有用工具，能幫助集團在吾等感興趣之城市，獲其市政府領導人選為合意的土地買家。」攞獎可以攞埋塊地，咪就好似啲歌星又或者電視台姐仔，要喺年尾頒獎禮度搶番個獎，有名自然有利嘛。
有名實利跟住嚟
咁，朗尼間恒隆究竟攞過啲乜嘢獎，又拒絕過啲乜嘢獎呢？華華即管揭吓本年報，睇吓佢哋往年攞過啲乜嘢獎，無意間發現登出嚟嘅獎項，同恒隆網上列出嚟嘅有啲出入。
根據恒隆網站，佢哋喺02年曾經攞過《Euromoney》唔少獎，主要係最佳地產公司，香港排名第四，中國排名第六，亞洲排名第三，但喺年報度就冇提過。
嗱，大家唔好亂諗，咁大間企業、每年攞埋咁多獎，篩選吓有乜咁出奇啫，朗尼呵！
電郵：mailto:[email protected]
