曾經，黎姿是一個物質和機會主義者，揀男友也會先看對方的職業，是否養得起自己。胞弟黎嬰的車禍，令黎姿的人生觀、價值觀有了翻天覆地的改變，她信了基督教，懂得了「平凡是福」，現時她只想找個真心的膊頭依靠，不用戴20卡的鑽石，也不用住山頂大屋。 撰文：張止寒
今年5月，黎姿的胞弟黎嬰發生嚴重車禍入院，黎姿向無綫告假全力照顧弟弟，有指她曾一度面臨崩潰狀態，至8月黎嬰蘇醒，黎姿才放下心頭大石復工拍攝劇集《珠光寶氣》。整個事件中，黎姿所表現的堅強，叫人刮目相看。她日前接受本報專訪時，被問到可曾有「頂唔住」的時候，她說沒有，因為「全家人靠我撐住」，雖然語氣、聲線皆溫柔，但她保護家人的決心，卻堅定不移。
感受人間有情
黎姿說：「細佬呢件事，令我知道世事常變，冇嘢係永恒不變，爭在變好定變懷。初初我唔相信呢個事實，係咁搣自己，以為自己發緊夢，慢慢先至接受到。我話畀自己聽要堅強，唔可以唔食嘢、唔瞓覺，否則冇精神處理細佬嘅事，我唔病得，全家人靠我撐住。雖然過程好辛苦，但承受嘅唔只我一個，呢個世界上好多人比我更加辛苦，我只係呢一分鐘辛苦，但細佬比我更加辛苦。諗深一層，人一定要前進嘅，要一路行落去，你永遠唔會知下一秒發生乜嘢事，只係你以乜嘢角度去睇件事，呢個世界你睇人好、人睇你好，人同人係唔可以比嘅。」
因為弟弟的車禍，原本沒有宗教信仰的黎姿，成為一名基督徒，她說：「細佬係天主教嘅，我以前唔識呢啲，到有事發生，突然覺得身邊出現咗好多天使，成班出晒嚟幫我，佢哋有我嘅朋友，亦有啲本來只係點頭之交，令我覺得人間有情，雖然呢個世界可以好現實，但畀我知道其實係有愛存在，呢件事令我接觸到教會，教友個個對我好好。我𠵱家每日趁空檔去探細佬時，都會為佢祈禱，嚟緊佢有一個有關頭骨嘅大手術，我會同監製請一、兩日假去陪佢。」
享受獨處時間
黎姿續說：「細佬𠵱家有反應，佢已經好叻，我知道佢需要一個好漫長嘅日子去康復，始終佢經歷嘅係一個咁嚴重嘅意外，我好驚佢會有併發症或者出現細菌感染。」
現時黎姿除了拍攝劇集《珠光寶氣》外，還要宣傳《通天幹探》、還廣告債，弟弟的病情加上工作壓力，令她透不過氣來，她說：「我以前好鍾意熱鬧，返到屋企會坐喺廳度睇電視，見吓父母，親人喺屋企行嚟行去嘅感覺係一種享受，但𠵱家我鍾意一個人靜落嚟喺房可以休息吓，更享受獨處，我知道呢個係上天畀我嘅考驗，令到我更加成熟去面對同處理人生。」
15歲加入娛樂圈的黎姿，一直是家庭經濟支柱，黎嬰有機會到外國留學，也全靠她支持，自小就領略到金錢的重要性。回想起以前捱得最辛苦的日子，黎姿說：「拍《我愛牙擦蘇》時拍到入醫院，嗰陣冇能力請助手，試過一星期瞓得一個鐘，導演知道我冇瞓過覺，所以跳拍人哋嘅戲份，畀我瞓一個鐘，連落妝都冇時間，戴住頭套唔拆就咁瞓，我記得嗰晚係聖誕，我將兩塊小型嘅木板道具連埋變一條長線，我就好似小龍女咁瞓咗喺板上面，我嗰陣應該係20歲。」
感覺最重要
頻頻撲撲20年搵錢，攞了無綫女主角獎項、弟弟黎嬰事業有成做了醫生，在一切看來最順利的時候，弟弟突然飛來橫禍，令到黎姿的人生觀、價值觀有了天翻地覆的改變，包括挑選愛侶的準則。她說：「我𠵱家知道人生唔只係金錢、機會。人哋話平凡是福，我以前領悟唔到，𠵱家我知道人生不如意事十常八九，冇事發生就係福，人生係多波折嘅。
「攰嘅時候，真係想搵個人，搵個膊頭挨吓，但係難搵亦都難求。我𠵱家揀對象，同以前嘅角度唔同，以前會考慮佢做乜嘢職業、養唔養得起我，但𠵱家覺得最緊要係感覺，錫唔錫我、人品好唔好，愛好緊要，冇愛只有經濟嘅人生係空泛嘅，咁嘅一生係枉過。一個人短短幾十年都唔知會發生乜嘢事，所以要好好活着。20幾歲時可能覺得戴住20幾卡嘅鑽戒、住山頂大屋會好開心，但其實唔係，我需要嘅，只係有一個人攬住我，對我真心、忠心、知道我諗乜，要有交流。愛情好似打乒乓波咁，要有來有往。但當然經濟仍然係重要嘅，我唔希望將來我嘅小朋友要好似我細個咁辛苦，起碼要衣食無憂。」
-做醜女挑戰演技-
正在播映中的《通天幹探》，黎姿收起靚樣，戴了副粗框眼鏡、戴上牙套扮大牙肉、甚至連說話都會流口水的黐脷筋平凡設計師，向實力派演員進發，拍攝時被途人批評「核突」，她對此卻前所未有的開心。
「咁核突嘅」
黎姿說：「呢個角色平凡得嚟有啲醜，醜得嚟有啲可愛，但心地善良，以前嘅黎姿係唔會做到呢個角色。初初我以為係做醜女，諗過腳跛、斷手、成面暗瘡癦屎、皺皮等，但監製王心慰唔想咁刻意，佢想用演技令到個角色平凡，對我嚟講真係好大嘅考驗。喺街拍呢套劇，觀眾竟然唔認得我，有人話『呢個邊個嚟㗎，咁核突嘅』，一個話『好似係黎姿喎』，但另一個話『黎姿邊有咁醜』，我真係好開心，證明我嘅扮相成功。」
唔執着獎項
黎姿憑《通天幹探》有份角逐台慶女主角獎，她表示沒想過要得獎，並說：「攞獎真係冇諗過，我𠵱家拍劇最緊要係滿足自己嘅表演慾，同埋得到觀眾嘅認同。」問是否因已攞過女主角獎所以「唔恨」，她說：「可能係啦，少少啦。」
今年的男、女主角獎項，黎姿看好李司棋和陳豪，她說：「司棋姐好正，我雖然好忙，但都畀我昅到大契病咗鬧楊怡嗰場戲，真係正。喺《珠光寶氣》佢做我媽咪，故事講佢點訓練三個女變為成功人士。至於陳豪，佢做得得哋好得，比起我初初識佢嗰陣嘅演技真係進步咗好多。」
攝影：林德雄
服裝提供：Versace
髮型：WanChan@hair
我是誰：繼承電影之父衣鉢
黎姿現年36歲，是香港電影之父黎民偉的孫女，祖母是香港第一代電影明星林楚楚，姑媽是演員黎萱。及後經星探發掘入行，開始拍攝電影和電視劇，演出電影包括《古惑仔》系列、《97家有囍事》和《BadBoy特攻》等，劇集則有《倚天屠龍記》、《我愛牙擦蘇》、《胭脂水粉》和《火舞黃沙》等。
於04年，黎姿憑劇集《金枝慾孽》中玉瑩小主一角，擊敗鄧萃雯等強敵，奪得台慶我最喜愛的女主角獎，令她人氣急升，也為她事業創出高峯。
