新疆新鑫礦業（3833）上周五首日掛牌，股價飆升一倍多，最高見14.9元，收報14.24元，較招股價6.5元高出1.19倍喎，對得住散戶，董事長袁澤喺上市儀式上面信心十足話：「新鑫係最棒！」今勻俾佢講中，以收市價計，做埋新股王，首日掛牌破咗中國傳動（658）升97.74%嘅紀錄。
認購一手嘅中籤率得一成，抽唔中嘅梗係揼心，至於抽中咗兩手嘅網友光早喺上周四暗盤度玩優先場，仲話：「真係好吸引，80%（暗盤價升幅），有冇新股可以第一日升100%？」
首日倍升 三手賺2萬
估唔到新鑫首日股價倍升嘅佢自我安慰話：「升100%都係比80%賺多1300蚊，更何況除咗658之外，冇一隻新股第一日升100%，3993（洛陽鉬業）都係第二日啦！」
當上周四隻股暗盤價彈到上11.4元時，心水清嘅馬兒已經話：「隻股有機會挑戰到中國高速傳動嘅紀錄。」
不過，光見暗盤價升咗咁多，就問：「賣唔賣好？大家點睇？」最後佢喺暗盤價11.68元時賣咗。但之後隻股都仲有得升，佢覺得好奇怪，「真係勁，唔通基金唔夠貨？12.5都照樣狂買？」而暗盤價最終收11.72元。
全職炒股隨時死
到上周五掛牌，新疆新鑫礦業升勢更勁，當升咗一倍時，賺到笑嘅edisonchan有啲忘形，話：「嘩，黐線㗎，三手新鑫開巿一個鐘，怒賺超過兩萬，好過打一個月工，決定辭職全職炒股！招金12蚊IPO升到42，中煤4蚊IPO升到28。」lemon_tea216搭嘴，「做咩學我？呢條路好難行，隨時死亡，我想搵工喎！」真係人各有志。
http://www.miniforum.org/