個市悶咗咁耐，終於有幾個大盤出嚟撐場。喺薄扶林數碼港嘅貝沙灣，趁大角嘴浪澄灣短期內出場，已搶先推售，其中一幢更俾基金用近20億買咗，得番一幢。而剩番呢幢，唔單止係成個屋苑最後一座分層，更有搵勻成個貝沙灣、甚至呢區都冇嘅一房細單位，雖然要賣成萬幾蚊一呎，相信仍然搶手。發展商喺現場搭咗個售樓處，有示範單位睇，不妨入去望吓，睇吓𠵱家啲豪宅點靚法。
「哈佬喂」就到，多個商場為迎接呢股全城大玩恐怖熱潮，搞咗唔少活動。睇完豪宅，不妨落銅鑼灣時代廣場，呢度搞咗個「哈佬喂」派對，有南瓜頭、巫婆同大家影相。
最近嘅市場焦點黃大仙滙豪山，繼續賣樓，去完尖沙嘴睇完示範單位，仲可以過旺角新世紀廣場，嗰度搞咗個「哈佬喂」活動，消費滿800蚊，可換領「HALLOStation限量版八達通卡」。
