蔡依林（Jolin）同KylieMinoque呢兩位東、西方樂壇天后，最近合唱咗首新歌《Inmyarms》，而戰勝乳癌嘅Kylie仲邀請Jolin去英國倫敦出席自己部紀錄片《WhiteDiamond》嘅首映禮。噚日Jolin喺EMI唱片公司高層陪同下，搭飛機去倫敦，兼且準備咗一隻價值萬幾蚊港幣嘅玉鈪送畀Kylie。
寄影帶促成合作
原來舊年5月Jolin去泰國出席MTV台頒獎禮時候表演過《舞孃》歌舞，當時佢拋彩帶高難度動作引起唔少外國歌手注意，唱片公司知道Jolin一直好希望同Kylie合作，於是趁勢將蔡依林嘅《舞孃》MV同演唱會片段寄畀Kylie睇，結果促成今次合作機會。
據講Kylie聽到Jolin聲帶之後猛讚蔡依林把聲性感，至於佢哋合唱嘅新歌《Inmyarms》，將會收錄喺Kylie下個月發行嘅新專輯之中。Jolin話今年雖然係第四次飛倫敦，但感覺一啲都唔疲累，佢話：「這次心情特別不一樣，因為Kylie是女神。」
