近呢個月，港股炒到㷫烚烚，唔少散戶乘機入市短炒賺番筆，連返緊工嘅都會昅實個市。kingline唔好彩，返工上網炒股俾老闆發現，「老闆話𠵱家俾兩條路我揀，一係就全職炒股，一係全職返工，叫我自己揀，做人真艱難！」
畀貼士老闆一齊炒
Taiming1就話：「唔使咁灰，下次小心啲，冇事嘅。」rubyip06亦話：「喺老闆面前扮吓死狗，過一排，件事丟淡咗，咪繼續炒過囉。」
francowai就好彩自己有個好老闆：「我老闆冇話我㗎，仲成日問個市點睇，邊隻新股抽得過，齊齊炒埋一份。」
窄卡維就醒咗招：「畀啲貼士老闆，溝通吓，等佢賺吓錢，引佢落叠，一齊炒咪冇有怕囉。」
dusty.com.hk話：「同佢講話要全職返工，不過調到四點後先開工得唔得。」
leong0961就話：「你都畀番兩條路佢揀，一係就畀間房你坐，咁就唔會有人知你炒股，一係就叫佢扮乜都睇唔到。」如果信佢照做，後果自負。
經濟通仲激：「使乜諗啫，炒咗佢啦，𠵱家大牛市機會錯失咗就無，你估個市真係唔會爆咩，爆咗之後又要等幾年㗎啦！」
http://www18.discuss.com.hk/viewthread.php?tid=5406634&extra=page%3D1&page=1