香港生活指數一向高企，經濟好番啲，好多嘢已經排隊申請加價，但人工加幅追唔上通脹，開支大咗，儲錢更加困難。
美國人遇到同樣問題，好多網友就喺《MSN》討論區入面研究儲錢嘅方法。Keasy話：「𠵱家我大約將人工35%用嚟儲錢，但10年前，我可以儲到80%㗎！嗰時我將自己間屋租咗畀兩個朋友，咁就變咗3個人一齊供樓，每個禮拜我都會工作超過70個鐘，再做13個鐘parttime，嗰陣真係好辛苦、好忙。」
生BB反而儲到錢
好多人都話如果要儲錢，最好嘅方法就係唔好生BB，但adgirl25唔同意，「喺囡囡出世之前，我同老公已經就儲錢呢個問題傾咗好耐，傾妥之後，就開始儲錢大計。我哋只會喺大減價嗰陣買衫，放假盡量留喺屋企，囡囡出世後，我哋仲多咗喺屋企煮嘢食，唔單止可以慳錢，而且健康啲，最重要係我哋可以以身作則，向囡囡灌輸正確理財概念。我哋好滿意呢種生活，上年仲可以儲70%人工！」
ngyoung認為，搵得多錢就易儲錢，如果搵得唔多，根本唔需要迫自己每個月儲50%人工，「點解要喺自己嘅黃金時間咁慳儉？我寧願用自己賺番嚟嘅錢享受生活，好過有啲人辛辛苦苦慳30年，到退休嗰陣先嚟使。」