韓國男星喺劇內劇外都畀大家正人君子嘅形象，但事實到底係唔係咁呢？最近當地嘅網友就將幾位男星同女拍檔拍劇或演出時，隻手擺位唔多正常嘅鏡頭剪輯放上Daum討論區。Rain、金載沅、金來沅等俊朗小生都慘成網友眼中嘅手多多藝人。
抱到笑騎騎
Rain早年曾經跟李孝利喺電視節目入面大跳辣舞，阿Deep睇返網友剪輯嘅圖片，Rain隻手好巧妙咁凌空停留喺李孝利大腿之間，為免惹人誤會，Rain好快就將手指屈番埋。不過再睇吓Rain笑騎騎嘅樣，佢似乎都好享受抱起呢位韓國性感女神喎！
至於金來沅喺劇集《哈佛愛情故事》度，試過強攬金泰希，阿Deep記得當年曾經有觀眾質疑金來沅鹹豬手，不過佢解釋只係拍攝時太肉緊，金泰希亦都冇嬲過佢。
Ryan耍鷹爪
講到手多多，姜志煥同兩位美女合照時雙手嘅擺法的確有啲怪，唔通佢要為兩位靚女𢱑痕？而PARAN靚仔主音Ryan喺劇集《甜心女當家》中，孭住李多海嘅場面，雙手突然變咗鷹爪，咁特別嘅孭人方法，阿Deep都係第一次見。
網址： http://tvzonebbs3.media.daum.net/griffin/do/phoshop/read?bbsId=A000009&articleId=198756
版主：網盜王尊尼Deep
本欄逢周一至五刊出