瑪嘉烈醫院兇殺案十分奇特，一名印度裔海員到醫院求醫，突然發狂，拿出八吋長刀，插下一名七十七歲婦人左腳，令呢名等候出院之婦人死亡。
婦人係邊位，唔係要點，總之十分不幸，緊要嘅係，點解會有印度船員，神推鬼擁咁樣攞人命。一位在葵涌四號碼頭嘅朋友慨嘆：「香港有郵輪碼頭嘅話，呢位老婦就不至於因入急症室而送咗條命。」原來印度船員來自郵輪藍寶石號，載四千名遊客來港補給，因香港無郵輪碼頭，迫於停在葵涌貨櫃碼頭，該名船員睇病，順理成章去咗碼頭附近嘅瑪嘉烈醫院，咁就命該有事，其中機率，要請紫微算一算。
如果啓德已建成郵輪碼頭，藍寶石號就唔會駛去貨櫃碼頭啦。上述朋友話：「啲郵輪大豪客嚟香港都幾百億㗎，有時啲郵輪到岸，幾十架旅遊巴士殺到，接佢哋到市區遊覽，佢哋一落船見到啲吊架、貨櫃，已經唔開胃啦。」
嚡，郵輪碼頭幾時先至起得成呀？事發之時，曾特首正在立法會發展「施政報告」，講到十大建設，第九項就係「啓德發展計劃」，但冇講及幾時動工，只係話希望二○一二年啓用一個郵輪碼頭，是否真會及時完成，大家都唔敢肯定。機場都搬走咗九年咯，啓德仲係用嚟曬太陽，香港究竟負擔得起幾多個九年唔做嘢呀？旅遊界人士望穿秋水，另一方面，貨櫃碼頭使用率並不太高，不妨作為郵輪服務噃！
所謂十大建設，最快嗰項（廣深港高速公路）都要等到二○○九年先至開工，其次係沙中鐵路線在二○一○年開工，點知啲建築股已經大升特升，早唔早啲呀，咁多隻建築股，股民點預測到邊間公司會中標？而中咗標啲公司，你估會實賺？建築公司利潤微薄，人所共知，不值得如此炒作，但在中國資金推動下，香港股市已經A股化，無可分析，總之你癲我又癲，玩鬥大儍遊戲，心血少者，請勿進場。