碰到一位維園阿伯，佢開聲就鬧田北俊「恐嚇」周松崗，搞到堂堂地鐵──以後就係香港鐵路──嘅大總裁都要立即道歉。周松崗何許人也，一個華人打工仔在英國，居然攞到爵士銜，其中之困難程度，問吓陶傑呢位英國通就知道有幾大，從中可以推論周松崗為人精明勤奮到識飛。以打工仔而論，周松崗縱橫四海，係不折不扣之地球人，雖然出身培正中學，但因為留在外國太耐，可能下意識地忘記咗喺香港呢個最西化嘅華人社會，面子與互相搔背脊仍然係最重要嘅，佢不妨向佢嘅威斯康辛大學同學邵善波多多請教。邵智囊對中國人社會，特別係逐步大陸化嘅社會運作模式，一定知得好清楚。
在外國打工得耐，少不免染上咗一啲對事不對人之作風，提名「屋企朋友」陳淑莊競選山頂區議員，以為好閒。但人哋唔係咁諗呢，話明以後會「對地鐵事務睇緊啲」，問佢怕未。維園阿伯對左丁山講：「如果黃毓民仲開緊咪，佢一定會鬧田北俊鬧得好狠，鬧到坼天，鬧得好好聽，可惜吖，佢已經冇晒地盤。」哈哈，佢又忘記咗，香港日漸大陸化，話事之人係對人唔對事嘅，將一個收聽率甚高嘅節目斬咗，炒埋節目主持人，明知損失廣告收益亦在所不惜，你估話事人係蠢嘅咩，一定計算精確，叻過我哋好多。
呢位維園阿伯係阿伯之中嘅民主派，經常俾班傾左嘅阿伯圍攻，在維園往往孤掌難鳴。佢話明年如果黃毓民出馬挑戰葉劉淑儀，佢一定跟埋去打仗喎。明年未免太遙遠，講咗今年場區議會選舉與立會補選先啦。一位在山頂居住嘅醫生話畀左丁山知，最近大清早出門，已經見到自由黨議員林文傑在街頭向選民打招呼，博印象分，十分勤力，少壯派陳淑莊想撼低林文傑，並不容易。寫到呢度，忽聞田大少公開宣佈收回罵周言論，並向周松崗道歉。於是阿周向阿田首先道歉，阿田又向阿周道歉，好玩過細路哥玩泥沙。有選舉，就有精彩嘢睇，相信未來個半月，好戲陸續上演。