官字兩個口，煲呔過去兩日真人示範，一把口批香港人爭取民主係文革，轉過頭又話收番，為免教壞「新香港人」，八方建議教育局盡快推出新版教科書，重新編撰成語「覆水難收」解釋，至於「禍從口出」點解，煲呔有辦你睇。
特首闖禍，政府上下呢兩日倒瀉籮蟹幫佢補鑊，其中最巧合嘅係，政府前晚深夜公佈有支道地烏龍茶含有滴露，令煲呔少咗個上頭版獻醜嘅機會。可惜樽烏龍茶得900毫升，杯水車薪，點撲熄煲呔點起呢場冲天大火呢？
佢愛將財爺曾俊華噚日即刻變身「救火隊」，喺電台話最少有500億盈餘，出年大有機會減稅，希望派糖，應該係放水，可以淋熄市民怒火。前教統局常秘羅范椒芬當年講錯一句說話12個字，政府要一擲17.6億元救火，平均一個字值億幾銀，煲呔今次長篇大論講錯嘢，逐個字計認真襟計，怕且財爺要開庫洩洪先搞得掂。
教亞視做新聞
煲呔把烏鴉口向來唔收，97年金融風暴，佢懶醒話聖誕節前就完結，結果俾人封佢做「聖誕權」；北京成功申奧，佢肉麻大嗌「今趟香港想窮都幾難了」；年初閂埋門向民建聯拉票，又批評環保團體驗蔬菜農藥前，「直情係浸過山埃先拎去驗。」佢啲廢噏語錄罄竹難書，好彩庫房氾濫，水頭充足準備救火，八方代表納稅人支持煲呔繼續語無倫次引火自焚，最緊要真金白銀還富於民。
星星之火，可以燎原，所以官員不惜使盡橫手撲救，八方收到風，線人指煲呔衰多口後，有官員致電亞視新聞部，提醒煲呔講完「文革論」，都有講市民理性爭取民主，報道要全面啲云云。有關人士睇完傍晚六點鐘新聞覺得唔啱睇，竟然再打多個電話，話亞視引述學者批評同播出文革片段，報道偏頗，同日11點夜間新聞呢啲內容冇咗，相信煲呔收貨。
當日煲呔接受港台英文台節目《Backchat》訪問，講錯嘢仲要寸嘴反駁主持當眾出醜，呢位撻着煲呔、令佢失言嘅主持人係港台高級編導許偉圖（HughChiverton），煲呔道歉後八方call佢，佢話不評論。據講佢嚟自英國，久居香港，多年來訪問過唔少名人政要，認識佢嘅人形容佢係「真正知識分子」。煲呔咁小器，又多個整治港台理由。