股市好似升極都有，07年尾股市上升最後一個動力，肯定係內地股民直通車落實通港，港交所主席夏佳理上《志雲飯局》畀貼士，「內地個人儲蓄係天文數字，就算得小部份嚟到，肯定都會刺激股市成交活躍。」不過，佢同時提醒大家小心呢亭政策市，「大家唔好忘記，中央今日可以放內地股民嚟香港投資，第日都可以決定畀佢哋去第二度，資金可以四圍走。」早幾日四叔提醒股民唔好高追，𠵱家夏佳理又叫大家審慎，高人有言在先，小股民輸錢唔好賴人。
回歸前夏佳理係律政司司長人選，北京最後睇中詩姐，夏佳理形容好彩，「上帝錫住我」，佢又話自己個中文名譯自姓氏Arculli，本叫夏高利，有個老友提醒佢似高利貸「大耳窿」，故改名夏佳理，音義更佳。