講到籃球Game，機友們十居其九會推介EA或2KGames，但SCEA啱啱推出嘅《NBA08》亦屬上佳例子。可能會嫌盤傳帶射唔多夠力水，不過該作最大特色係要玩家重新演繹去季各場精采賽事，唔知大家有冇辦法幫姚明、勒邦占士同高比拜仁成功翻案呢？
撰文：陳福榮
猶記得去年為咗趕及PS3發售，明明未做好嘅《NBA07》都夾硬搬出去用嚟谷機，結果係點唔使多講大家都預計到，就係俾人媽到七彩有損品牌地位。亦因前車可鑑，開發團隊今年就不敢怠慢，拿拿聲盡早搞掂呢隻《NBA08》俾各位玩，如今佢真係執番好晒啲嚴重鑊氣，只係最終係咪你杯茶就好睇個人喜好。
講番佢啲內容先，最令人值得花費精力嘅固然係NBA球費重演，事關開發人員精心挑選咗68場上季幾有回味價值嘅比賽，玩家要喺指定情況下達成目標先算過關。例如只剩番數分鐘但要連追8分，仲規定必須有兩球係直入3分，連起手位置都固定咗冇得求其射，玩到咁真實究竟係咪好事，純粹視乎你是否NBA超級Fans。
育成收集要素多
儘管《NBA08》嗰幾款小遊戲，如鬥射三分及單挑上籃等都唔係新嘢，但總算聊勝於無，事關要靠佢嚟賺分開啓各項隱藏要素，好似新款球衣及提升原創選手嘅能力等。正式賽事入面，若針對某位球員做到急速過人或者封殺射球等，都會獲得可觀獎分！
但整個遊戲嘅推進流程唔夠爽快，不順滑情況比比皆是，而交波之後又冇得即時二傳，結果嚴重拖慢晒個攻勢節奏。同埋可以用十字掣嚟指定傳球對象，但班守衞卻堆得密麻麻兼且人盯人，所以經常都會發生被人半路中途截走個波，一隻攻勢唔銳利嘅籃球遊戲，攻極都攻唔入，玩得耐其實都會幾𤷪。
球隊管理略嫌失望
唔少球類遊戲如足球及籃球，好流行領隊系統，以便大家喺全季球賽過程裏有多啲變化，只可惜本作並無爭奪即年新秀（Draft）、挖角簽約、管理球隊財政、設定薪金上限等近乎隻隻NBA遊戲都有嘅點子，再者所謂嘅轉會亦毫無規矩可言，連最垃圾嘅廢柴都可以換到天王巨星，相比《Winning》簡直係兩回事，轉會搞得咁差實在大幅減低全季模式嘅可玩性。
雖然有唔少敗筆之處，但值得大讚嘅係呢隻Game引入咗個三色射球計，當喺地面準備郁手或者跳到半空要JumpShoot，起手點就會出現一個顏色光環，佢個原理係好似玩高爾夫球遊戲咁，只要睇準時機就保證一定射到穿針靚波。
睇真千祈咪買錯
鑑於臨近新球季開鑼，幾間廠商都會喺呢段時間推出新作，除咗SCEA《NBA08》之外仲有EA《NBALive08》同埋2KGames《NBA2K8》，大家一定要認住太陽隊1號仔史杜達米亞做封面嗰隻呀！假如閣下家中並未置有PS3，其實本作都會喺PSP及PS2推出Low-end版本，但都係嗰句「千祈咪買錯」喎。
機種：PS3
廠商：SCEA
類型：SPT
人數：1-4人（網上2人）
價格：約$380
查詢：I-Gamer（27253338）
