大閘蟹季到，一眾蟹迷終於可以出山啦！沉寂一年，還記得蟹肉的鮮甜、蟹粉的美味嗎？能夠一次食足5隻大閘蟹的關楚耀，近期在roadshow做節目教人食蟹心得，一於看他拆、啜、嗒、咬，如何吃出大閘蟹鮮味，且計吓那種蟹粉變種新菜式，擁有最多蟹粉，睇過先話「抵食」！
記者：郭佩韻
攝影：陳盛臣、譚盈傑
蟹王關楚耀 日食5隻大閘蟹
出道已有年多的關楚耀，人人識他，因為他是譚詠麟的契仔，近日最新出碟《你當我什麼》唱到街知巷聞，以為他只有唱功叻，原來食蟹都有一手，「因為爸爸很喜歡食蟹，3日唔埋2日就有蟹食，我以前可以一次過食5隻大閘蟹，但真係好肥好膩，𠵱家食2隻就已經好夠。食完蟹隻手好大蟹味，爸爸教可以用牙膏刷手洗去味道，真係掂喎﹗我食蟹食得咁叻，是因為阿爸教我㗎！」本來不是太信關楚耀喜歡食蟹，後生sell型仔look怎會慢慢坐定定嘆隻蟹？但拍攝當日，時間緊迫，他本來要趕下一場，臨走前仍要拿着大閘蟹啜膏吃肉，頒個年輕一代的蟹王稱號，似乎也很貼切。
即睇關楚耀乃父真傳食蟹功
1.首先把蟹腳仔拆走開，再打開蟹蓋，紅紅橙橙的蟹膏十分吸引。
2.蟹身要清走肺部，拔走內裏六角形的至寒的小塊肉。
3.急不及待咪起嘴啜蟹膏，很濃蟹的甜味啊﹗
4.蟹腳仔有好多肉，要食得滋味，慢慢用鉸剪剪邊，吃盡蟹腳肉。
5.大閘蟹箝不會很硬，用口咬開，已可對付蟹箝肥美的蟹肉。
6.用專門食蟹的棒條，一拮蟹腳肉自然而出，即時送到嘴邊。
7.大啖大啖把蟹肉送入口，蟹肉彈牙，蘊藏肉質的鮮味。
8.蟹身有好多肉，慢慢深情一啜，難以形容的快感。
9.蟹粉新菜式，懶人唔想拆蟹都可品嚐食蟹的滋味，關楚耀笑言，幾乎可以當飯食﹗
飽滿 燴蟹粉菜式足4両蟹粉
清蒸大閘蟹年年食，食得多都懨悶!一於試試變種蟹粉新菜式，帝苑酒店中菜廳東來順，多款蟹粉新食法，揀勻幾十間食大閘蟹的地方，眾多菜式以這裏蟹粉為最豪最多，好想滿足對蟹粉的食慾，是一個不錯的選擇﹗
大閘蟹粉石榴翅$208（每位）
賣相很精緻，一個小口袋，用薄透的蛋皮製成，內裏載滿石榴翅、蟹粉、金菇及竹笙，仲有清甜的南瓜蓉海鮮湯包圍，吃一口足夠幸福﹗
滑魚丸燴蟹膏$128
新鮮鯇魚打成魚丸，燴7成蟹膏、3成蟹肉製成的蟹粉，蟹味濃，魚味鮮，蟹粉足有4大湯匙稱霸。
蟹粉粢飯糰$118（4件）
入口似粢飯，入面啖啖鮮甜蟹粉，即時令粢飯升格為豪華版。
抵食 上海式蟹粉菜
上海人最識食蟹，創出來的蟹粉新菜式，亦不失其上海菜的傳統風味，如果想食平民少少的大閘蟹宴，嚼江南的中價菜式，絕對是你那杯茶﹗
蟹粉炒魚翅$198
勁食蟹粉之選，足足有4大湯匙蟹粉，撈飯食都得，蟹粉中混入魚翅，師傅巧手一炒帶出香口鑊氣。
蟹粉錦繡冰豆腐$118
冰豆腐用沸水煮過再雪足整天，滲透蟹粉鮮甜，再來一口菜肉雲吞中和，感覺新鮮。
健康 清淡蟹粉菜
食大閘蟹很高膽固醇，越來越多人倡議要食得健康，海景嘉福酒店粵式菜館海景軒，推出以清淡健康中西合璧烹飪大閘蟹新菜式，梁輝雄師傅今季菜式，加入新鮮蔬菜，一來健康，二來消除蟹膏的飽膩感覺。
蟹粉津菜卷$158
經烹調過的甘香蟹粉，燴入津菜裏，清甜可口，點少許蟹粉吃，更有風味。
蟹粉西紅柿$328
香滑的蟹肉豆腐釀入番茄之內，賣相吸引，實不忍把番茄弄破。
豪吞 10両太湖大閘蟹
洲際酒店欣圖軒，高檔路線大閘蟹套餐盛惠$1,328，一隻大閘蟹，3款蟹粉菜式，薑茶蓉湯圓甜品，酣一杯越州家釀捌年陳花雕或越山仙雕貳拾伍年，買醉憶蟹香。
蟹粉海虎翅$550（每位）
蟹粉配海虎翅最矜貴，粗大的海虎翅，包圍鮮甜的蟹肉及蟹膏蟹粉。
蟹粉燒釀帶子豆腐$260
滑滑的豆腐，上有帶子大大粒，鋪滿3湯匙蟹粉，鐵爐保溫，最合時令。
查詢
帝苑酒店東來順 （27332020）
嚼江南 （26280299）
海景嘉福酒店海景軒 （27312883）
洲際酒店欣圖軒 （23132323）