氣象學家傑克親眼目睹南極冰層斷裂，氣候急劇變化，加上各種專家分析同情報，顯示地球正面臨大災難，通知政府同時，又發現自己兒子竟然被困於紐約災區，要冒生命危險到環境惡劣曼哈頓區拯救兒子，過程相信唔少人都從《明日之後》睇過，不過新出Blu-ray版嘅高清畫面，更加令人體驗到大自然威力。
記者：許福合
洪水肆虐紐約
另一場講到傑克的兒子森姆被困於受洪水肆虐嘅紐約市，被迫滯留於圖書館內，導演為求拍出最逼真效果，利用一個大型水箱做出紐約市被洪水重重圍困嘅場面，在BD版上，這場戲更增加咗洪水湧入城巿嘅氣勢，尤其洪水冲入時嗰種水花四濺場面，以往睇DVD就唔多覺眼，BD版就明顯咗好多。聲效方面，就感覺唔及畫面進步，筆者就覺得可能與電影題材有關，內容屬天災場面為主，可表現聲音幾邊走嘅戲份唔多，最有印象仲係冰塊裂開聲音，嗰種清脆效果，只要配合個靚喇叭，就能夠好好享受。
冰塊 龍捲風逼真
喺《明日之後》內，經常出現好多嚴寒冰封場面，除咗考驗導演拍攝外，對電視要求亦相當高，以往睇DVD，可能有人都留意到，畫面就經常白茫茫一片，無錯！就係畫面都只係白色，完全睇唔到嘢，高清版呢方面就有明顯改善，好似冰層斷裂嘅場面，配合高清電視欣賞，冰塊紋理都清晰可見，另外經常出現大風雪，亦可以話重現喺觀眾面前，以往忽略嘅地方，都可以喺BD上睇到，另外有幾場龍捲風吹襲嘅戲份，雖然知道都係電腦特技效果，不過不得不讚特效功力，喺BD級顯示質素面前，仍然相當真實，有時走近電視睇，龍捲風逼近大廈，外壁窗框樓梯都可以睇到，逼真好多。
必睇位
查詢：得利影視（27870678）