海洋公園主席盛智文扮鬼扮馬做宣傳，其他高層點可袖手旁觀，行政總裁苗樂文同多個高層開OT扮鬼嚇人，時運高嘅入場市民，可以留意吓失驚無神快閃擦過身邊嘅係咪呢啲高層。
火花來自鞋頭鋼片
哈囉喂有250隻嘩鬼四處嚇人，其中16個受過特別訓練，部份更係特技人，喺黑暗中突然衝入人群，雙膝跪下向前急速衝前，發出巨響外，腳底會擦出火花，小啲心血隨時俾佢嚇到彈起，呢隻咁驚嚇性嘅鬼怪，就係苗樂文四年前引入嘅「黑夜溜手」。
苗樂文同八方講，大約30年前喺美國一主題公園工作時首創呢項絕技，雙膝雖已戴上特厚護墊，不過訓練不足都會受傷，鬼咁痛；巨響同火花其實來自鞋頭上的鋼片，部份「黑夜溜手」更會打空翻，好鬼勁。佢話高層每年都粉墨登場混入人群，一來與眾同樂，同時了解入場人士反應，佢話多數人嚇一跳後，會搵番隻嘩鬼合照，「31號當晚，我都會再出現呢。」
扮吸血伯爵嘅副行政總裁李繩宗稱，今年鬼咁多人入場，門票較去年同期賣多三成，連自由行都嚟撞鬼，正考慮出年增加開放日子，大開鬼門關。