美國民主黨鑑於過去兩次總統大選，有好多白人中產，藍領階級，易受電台TalkShow（脫口騷）節目主持影響，幾乎全部投票畀喬治布殊，於是背後鼓勵自由派人士，成立一個LiberalAirAmerica電台，節目主持人與保守派主持人RushLimbaugh、BillO'Reilly對抗，宣揚自由派理念。點知市場好現實，自由派節目冇人聽，呢個LiberalAirAmerica於○四年成立，○六年就宣佈破產關門。
今年民主黨改變方法，以網站、博客誌圍攻保守派電台主持人，前星期出動四十一名民主黨眾議員聯署一封公開信畀Limbaugh嘅廣播聯營團體，投訴Limbaugh，其他民主黨議員則通過議案，譴責此君對反戰士兵及黑人嘅言論含侮辱性。
做節目主持可以有咁大影響力，唔怪得本港鄭經翰與黃毓民成為某些人眼中釘，卒之將佢兩位逐離電台。你話呢兩位仁兄喺○八年重出江湖，出現於某電台，你估對○八年立法會選舉有冇影響呢？美國一個調查顯示，經常收聽保守派脫口騷節目嘅聽眾嘅選舉投票率高達七成九，而選民平均投票率只有三成九，可見電台有影響力嘅節目的確可以驅動選民投票。
有趣嘅係，美國民主黨嘅最新網站，博客誌攻勢可否完全抵銷，甚至打壓到保守派電台嘅聲音。報紙已經唔係最重要嘅輿論陣地，廣播與互聯網先至係戰場，邊個集團可以同時操控互聯網與電台嘅，政治勢力就會向此集團靠攏。網站人人可以設立，博客網誌更可日日生產，只係電台數目仍然受到政府控制啫。香港未來一兩年是否有新電台出現，左丁山唔知，如果有嘅話，必然惹來各方注視，兵家必爭。
話得說回來，雖然電台政治時事TalkShow節目可以發揮重大影響力，其實係靠人，如Limbaugh、鄭大班，唔係靠團隊。目前本港電台電視缺乏如此人物，節目趨向財經化，齊齊仿照新城財經台，連啲節目內容大概都抄埋。香港傳媒其實缺乏創意，一見別人條橋收得，便照抄無誤，令到各自面目模糊，損失嘅其實就係聽眾與觀眾。