澳門人話西醫唔及中醫Work，去涼茶舖當睇醫生！
以前人人爭來香港打工，時移世易，今時今日澳門竟成為港人一個最新打工熱點！無他，物價低、人工高，返香港又話咁易。有一樣，港人唔多知，原來澳門風格，悠悠閒又一Day。雖然一日工作12個鐘嚇你一驚，不過就輕輕鬆鬆，放工仲有精力直落玩幾個鐘。過來人肥仔忠哥都話：「直頭好似退咗休！」
記者：盧家蕙 攝影：伍慶泉
「澳門人慢條斯理，慣咗今日工作明日做，不過𠵱家已經比我剛嚟嘅時候快咗好多！」忠哥是建築師，人人叫他肥仔，在澳門工作四年，朝8晚8，一星期返5日半。做足十多個鐘但就依然覺得輕輕鬆鬆的他，節目豐富，全男班或者一支公，都一樣有樂趣。沒有賭、沒女人，澳門的夜生活會是……
8:00pm平價豪食
日頭猛做，放工梗係先醫肚！肥仔說：「香港人來到澳門，最開心係食乜菜都抵過人，豪食邊個唔識，不過捐窿捐罅搵地踎嘢食就仲過癮！」就講上海菜，澳門就少之又少。「酒店內的餐廳有供應上海菜，不過貴到飛起；呢間位於皇朝區嘅上海菜館，水準不錯，食得多馬介休都悶啦，唔轉口味唔得！另外，我哋經常過珠海搵好嘢食，更抵食、選擇更多，澳門人都好鍾意過拱北搵食㗎。」
9:00pm碌Ling當運動
食飽飽，有咩搞？肥仔跟友人拉大隊朝白鴿巢的「佳景樂園」出發。他說：「呢度咁隔涉，唔係香港同事介紹都唔識嚟！放工食完飯碌吓Ling，當做運動囉！喺香港點會玩呀，呢度冇嘢好做嘛，成班Friend碌碌吓就玩上癮喇。」話口未完，肥仔又撞到成班同事在鬥波，幾十蚊碌足全晚，好抵玩！碌完Ling仲打埋機。現場所見，呢間「佳景樂園」似足八十年代香港機舖，但就諷刺地成為香港人「新」蒲點！
10:45pm無靚女都啤啤佢
玩完一輪，出了身汗，咩都落晒格，最好梗係啤啤佢！肥仔說唔少港人都蒲酒吧街。「夜少少就更多人，我最鍾意坐室外吹住海風同朋友吹水，酒吧街除咗澳門人，最多賓賓同鬼佬，索鬼妹？冇喎！間中會去後面街唱K。呢度唱K好得意，係OpenArea，唔似得香港一間間K房，你唱咩全世界都聽到，唔想獻醜就唔好去咯！」
12:30am凉茶舖睇症
回家前，肥仔一行人竟提議去凉茶舖執番劑凉茶飲，半夜三更飲凉茶？肥仔說：「喺澳門，最怕病！澳門醫療設備明顯唔及香港，我試過要漏夜返香港睇醫生。人人都話呢度中醫比較信得過！」所以肥仔一眾過江搵食的港人都學足澳門人：凉茶醫病！「睇症處」竟然係「三鄉地道凉茶」！只見凌晨時分，依然人頭湧湧，事頭婆先要睇脷，再問長問短，十足醫師，然後左溝右溝，整你一大碗凉茶。肥仔就話好Work，不過大病就一定要返香港！
每晚的消閒節目重複又重複，咪好悶？成班男人七嘴八舌跟小記說：「呢度的確悠閒好多，生活節奏又慢，澳門夜生活講到尾唔係賭，咪就係女人囉！身處香港時，間中會來賭番兩手，𠵱家公司明文規定唔可以入賭場，仲好！」肥仔的朋友明哥說。肥仔就話，要趁這機會，好好享受在澳門的半退休生活！
