伍晃榮復出？冇錯，我求大俠收到風，「阿盲」今個月下旬將會聯同Keyman、鍾志光一齊主持新一輯嘅〈球迷世界〉。據無綫體育科監製李漢源講，近期本地波越來越受球迷歡迎，所以決定將停咗兩年嘅〈球迷世界〉重新上馬。
相信唔少後生一輩球迷都係睇〈球迷世界〉大，佢嘅經典開場音樂，更加變成現時至Hit手機鈴聲一款。據李漢源話，喺85至86年由〈足球雜誌〉改名嘅，當時主持之一嘅蔡育瑜現已經過檔nowTV，而90年代初加盟嘅林尚義亦已經退休，餘下嘅開國功臣就只有鍾仔，所以加入Keyman同伍晃榮，都係一個新嘗試。
鍾仔夾Keyman伍晃榮
至於報新聞好生鬼嘅伍晃榮，因為佢唔慣講波，所以喺節目就會主力報道有關本地足球嘅特寫故事。節目由以前1小時縮短至半個鐘，內容亦同以前有別，冇咗荷蘭等其他外國波，節目純以本地足球為主。
重新推出嘅〈球迷世界〉第一輯預計喺20號（周六）2:15pm出街，但網民對於周六呢個時間播〈球迷世界〉持反對意見，goal3網民irwin回應﹕「麻煩畀番星期日11:00am呢個時段啦；一來慣咗，十幾年都係呢啲時間；二來星期六下午一定有賽事，搵阿水睇咩。星期日出街，可以即刻睇番星期六嘅比賽，比較新鮮，唔使等成個禮拜之後先睇得到。」