如果話高達《VS系列》係Bandai喺街機同家用機嘅王牌遊戲，咁喺手提機就肯定係啱啱出到第三集嘅《GundamBattleChronicle》，好評不絕，狂加新機款、改善原有系統，未出已備受期待。當然啦，可以用到《馬沙的反擊》兩位老人家做主角，重現高達決戰沙煞比嘅經典場面，真係連街機都未試過有咁正斗呀！
文：陳福榮
超豪華任務內容
《GundamBattleChronicle》(以下簡稱《GBC》)係繼《~Tactics》與《~Royale》之後PSP原創高達系列第三炮，雖然初代表現一般，但上集已成為機迷心頭好，因此今集自宣佈開發以來都係網上討論區嘅HotTopic。今集要變嘅首先係涉及劇情數量，而《GBC》幾乎包含晒整個UC年代，收錄故事由《0079》一直囊括至《Z》，任務就大幅增加到120個。莫講話想全部拎晒最高評級SS威俾朋友睇，就算全部Clear都需時甚久，抵玩程度拍得住PS2版《高達VSZ高達》要打爆所有任務咁誇張。
機體多動作更多
今集機體由《0079》一直掃落《馬沙的反擊》達140款，除咗任務模式包含在內嘅舊版高達、大魔、百式同重高達等之外，仲有ZZ、GP02A、GP03D甚至幻之名機S高達，連同各款吉姆渣古等小角色，想揸咩機嚟執行任務都得。亦因新增咗無重力嘅宇宙版圖和水底戰，同玩《SD高達》相似，大家平時睇唔起嘅機體如魔蟹，就會喺有關場合大派用場，稍不留神就會被電腦盲拳打死老師傅。另外，唔知係咪《VS系列》太深入民心，雖然講好玩程度《GBC》仲未追得上，但佢就不斷喺呢方面力求突破，儲勁射擊與近距離格鬥已經好熟口熟面，Dash駁連續劈幾嘢嘅Combo更係常用招數，此外仲加埋垂直升降嚟方便避彈㖭。
改裝強化機體
由綠渣以至ZZ高達嘅每部機體，都有多項性能數值影響作戰效果，玩家除咗可以調校機體外，連雷射槍同大炮都有改變。若然將部機升級至突破本身界限，火力會幾何級提升，真係幾恐怖吓。另外，根據原著分成數個版面分歧，因應某項條件而決定路線，而且會係一口氣牽涉幾關，連角色與機體又會產生微妙差異，一關亦會變成多至幾十種不同組合。
Wi-Fi合作模式
有唔少新手都抱怨本作難度稍嫌高咗啲，可以多用Wi-Fi連線同合作模式練習，前者可以體驗「老阿寶對老馬沙」，當正睇緊電影版《馬沙的反擊》，而合作方面亦可以搵朋友代替電腦拍檔執行任務，最啱唔想靠廢柴電腦幫拖嘅人去玩合作。
機種：PSP
廠商：NamcoBandai
類型：ACT
人數：1-4人
售價：$280
查詢：I-Gamer（27253338）
