劉嘉玲周一晚原本想去中環IFC睇男友梁朝偉主演嘅《色，戒》，但因夾唔啱時間，結果睇唔成，扁扁嘴冇癮離開，之不過佢前日終於睇咗部戲啦！
冇諗到咁大膽
不過聽聞嘉玲睇完部戲出嚟時，面黑黑，好似唔係咁開心，身邊啲朋友都睇得出，佢好介懷部戲入面嘅情慾戲。鬼咩！睇住個男友同另外一個女演員連續拍三場咁大膽嘅床戲，兩個人剝光豬攬到實一實咀來咀去，點大方嘅女朋友都頂唔順啦！
對於第二場床上戲，偉仔同湯唯嚟個正面進入嘅情慾場面，據嘉玲身邊朋友講：「嘉玲同啲朋友都有討論究竟係咪打真軍，雖然佢明知偉仔只因劇情需要至同湯唯親熱，偉仔拍之前又一早報定案，但嘉玲真係冇諗到會大膽成咁，重要一場比一場激，梗係睇得唔舒服，不過佢明知男友喺內地忙緊拍《赤壁》，又唔想打長途電話去投訴。」