兩位阿太競選馬力遺留落嚟嘅議席，不知鹿死誰手。𠵱家到投票日期（十二月二日），仲有七個星期，乜嘢事都可以發生，好難講陳方氏贏還是葉劉氏勝。政治上，一個星期可以發生重大變化，何況七個星期？譬如兩星期前，英國工黨政府猛咁放風，該黨提早於十一月舉行大選，連選舉辦公室人選都話組成班子，買入新枱新椅，好似真係打到嚟。而首相白高敦就突然訪問伊拉克，宣佈撤兵一千，所為者何？為咗競選造勢而已。點知到咗上星期周末，白高敦急見BBC政治記者，明確表示唔會提早大選，要等到○九年再講。其中有乜原因，咪係一個星期內民望轉向，保守黨民望升，白高敦冇選舉大勝嘅把握囉。
政治現實日日變，白高敦一於戰術上退卻，捱罵都唔肯提前大選。至於我哋兩位阿太，大家唔知佢哋有乜戰略，但戰術上就輪流蝦碌，陳太遊行一陣走咗去恤髮，雖說充份發揚女性愛美愛整潔嘅天性（亦係陳太嘅真性情），難免俾人批評為「我行我素」，對遊行撐民主唔夠誠意。而葉太俾電台訪問，自爆陳太當年唔批准佢升級，與佢在背後說黎慶寧之事有關，充份顯示出不忿之情，難怪《南華早報》話佢newlook,newoutlook,butsameoldgrudges（十月八日第二版），不忘舊惡。
好難怪嘅，兩位阿太係前高官，未經選舉洗禮，一旦放下身段，走入群眾，未免係生手，言行舉止，都冇充份考慮到公關角度與及香港傳媒鍾意煲大芝麻綠豆嘅八卦小事而睇唔見大森林。香港傳媒好多時只識誇張，不願分析，小小事都可以變成大新聞，公眾人物不可不防㗎。
呢場兩位阿太對抗，唔關乎民生大事、唔關乎邊一個髮型靚、邊一個笑得甜、邊一個有中聯辦調動所有支持力量或泛民主派各佔山頭各自發話，而係關乎香港島六十萬名選民對民主普選嘅訴求。事情至今發展得比較明顯，就係鐵板一塊嘅泛民建聯派vs散收收冇紀律嘅泛民主派，港島選民支持邊個，唔使睇邊位阿太去恤髮，換髮型，只係睇吓自己是否支持民主理念啫。