11/10/2007.....
驟雨
最新動態
我賭波最重軍情同對賽雙方嘅戰意，自己得到目標投注球賽嘅軍情資訊，應該比一般波友快同多；加上無論你喺邊度買波，熱門一方通常越買越熱，所以唔計輸贏，我都怕蝕底嗱嗱臨買定啲早飛盤，一條隔日買定嘅熱門三串一主客和過關，中咗可多開賽前落注8至10巴仙回報。
講起固定賠率，現在連香港賽馬都想試吓玩，我個人梗係舉腳贊成。回想起自己去英國馬場賭馬，睇到場內各大小莊家（bookies）放一個牌，搵個職員企喺張凳仔上面，叫人埋嚟幫襯；我就好似大鄉里咁，每場逐檔去睇吓邊間公司買我隻心水馬最好分，不知幾過癮。好過𠵱家賭香港馬，嗰啲澳洲幫一落飛，心水馬中咗分分鐘少派一半彩金咁谷氣。
足智彩係壟斷生意，仲天真到以為波友焗住要幫襯，派彩有上限，又唔係場場開最受歡迎嘅亞洲盤（仲要最少買200蚊），有時都令到波友幾氣頂；最近官方嘅民政事務局，仲協辦咗個「睇波.不賭波」嘅宣傳運動，吓，一路收保護費，一路叫人唔好入黑社會，真搞笑！
蘋果波神
股市大旺，英超盛世，大家齊來贏多啲！
http://hk.myblog.yahoo.com/footballexperts/
逢周一至五見報