早前旋風式嚟咗北京同香港簽約嘅李準基，幾日前已經返咗去韓國喇，佢向來都好錫fans，所以一返到家鄉，就喺blog度上載唔少喺北京同本港嘅相片同文章。基哥對於今次香港之旅印象唔錯，佢同一大班工作人員去山頂蠟像館遊玩，仲作狀同姚明打籃球㖭！
扮師傅片鴨
睇到基哥嘅相片，阿Deep發覺佢同班工作人員私底下都好老友，齊齊喺山頂影相留念之餘，仲喺蠟像館玩到不亦樂乎。基哥似乎對美國事物情有獨鍾，先後跟總統喬治布殊（GeorgeW.Bush）同畢彼特（BradPitt）等名人明星蠟像合照。喺北京期間，佢對北京填鴨好有興趣，扮師傅學人片鴨。
相信本港fans最開心聽到嘅係，基哥留言話雖然喺香港好忙，但依然過得好開心，仲希望可以留耐啲喎。唔知佢會唔會再嚟香港玩呢？佢仲話要多謝中國同香港fans送咗咁多得意禮物畀佢，又話自己上星期着咗件中國衫返韓國。不過，為咗訪港而無法出席上星期釜山電影節開幕典禮，就令基哥有啲遺憾。
網址： http://www.cyworld.com/start006
版主：網盜王尊尼Deep
本欄逢周一至五刊出