肥姐沈殿霞去年接受通膽管及肝腫瘤切除手術後，病情一直反覆，但她仍勇敢堅強面對，跟病魔抗戰到底。昨日，肥姐突然昏迷送院急救，令其身邊一眾友好均擔心不已，如跟肥姐相識數十載的修哥胡楓，坦言看到新聞報道後「好擔心、好痛心」，希望肥姐能堅強起來，早日康復，希望肥姐不要放棄，力撐到底，早日戰勝病魔。
至於姜大偉、汪明荃和張耀榮等一眾友好，也誠心送上祝福。另外，何麗全則透露肥姐渴望出席下月舉行的無綫台慶，甚至上台親自領獎。
撰文：李全
胡楓：堅強抗病
「我睇新聞知道呢件事，梗係好擔心、好痛心，希望佢堅強啲，呢啲時候大家（肥姐家人）都唔接電話㗎啦，大家都好心煩，冇謂再煩住人哋，所以我都唔會打電話住。你（記者）幫我講，話修哥叫佢（肥姐）堅強啲，希望佢快啲好番！」
姜大偉：唔好放棄
「我每個星期都會同佢食一次飯，最近一個星期都有見佢，覺得佢情況都OK。今日我都係睇新聞先知佢入咗醫院，知佢轉咗院，情況好咗啲，我會同佢打氣，希望佢千祈唔好放棄。」
何麗全：有份提名
「我今日都有打電話畀肥姐身邊人了解情況，其實喺星期一欣宜拍《連心》MV，仲好好，好精神，個MV拍咗成個下晝，肥姐傍晚到，起初要拍MV係唔敢打擾佢，最後佢都有出鏡，之後一齊食飯，佢仲好好胃口，不過可能之後佢食完啲藥，有少少事。之前同肥姐傾過《歡樂今宵》大聚會佢都話會出席，仲有《萬千星輝賀台慶》佢同佢個節目《有緣相聚》都有份提名（最佳節目主持），佢話如果有獎攞佢會嚟！」
汪明荃：希望冇事
「我一路有留意新聞，佢好似轉咗醫院，情況係咪好啲？希望佢冇事啦！」
甘國亮：愛得投入
「肥姐個人好率直，以前喺訓練班，佢最無大無細，見你哋操守有問題，就會直斥其非，但你好，佢就好錫你，會幫你爭取機會。以前佢叫過我寫一個劇本叫《女人三十》，當時佢同秋官啱啱拍拖。同埋最深刻係《輪流傳》腰斬，仲緊張過秋官本人，佢愛一個人係會好着緊個愛人發生嘅事。」
劉德華：快啲出院
「今日我哋成班人去廣州宣傳《兄弟》，大隊到咗酒店休息時，睇電視新聞知道肥姐入咗院，大家都嚇一跳，好擔心肥姐，希望佢堅強啲對抗病魔，可以快啲出院啦。」
張耀榮：默默祝福
「我知道肥姐入咗醫院，但呢個時候我諗唔係咁適合去醫院睇佢，我知道𠵱家佢情況OK嘅。如果有乜突發事情發生，相信我會收到電話，暫時都平靜，𠵱家可以做嘅，就係默默祝福佢。」
郭峰：為佢祈禱
「同肥姐喺《歡樂今宵》合作過，佢好好人㗎，我以前做生意佢都有幫手剪綵。今日睇新聞知道佢嘅病況，不過佢𠵱家身邊有咁多人，都唔方便打擾佢，我會為佢祈禱，希望佢早日康復。」
奮不顧身演欣宜MV
肥姐愛女鄭欣宜近日積極備戰樂壇，準備年尾推出的大碟，一向愛女如命的肥姐也身體力行支持，雖然近日她病情反覆，但依然為愛女的新歌MV拍攝助陣。本周一（8日），肥姐就特地一早前往經常光顧、位於九龍城的蘇珊髮型屋恤髮，然後回家化妝，換過衣服便再出發到劉家昌西環寓所客串欣宜新歌的MV，並未有理會舟車勞頓對其健康的影響，可謂用心良苦。
一網講盡：「懷念肉騰騰嘅肥姐」
肥肥昨晨突然在家中昏迷，一眾網友紛紛留言祝福，為免好事之徒搞破壞，版主更訂下規條，謂若有會員假發肥肥死訊，將被扣分或禁言處理。另有網友在YouTube放上短片，名為「肥姐GetWellSoon」，每次瀏覽便代表給肥肥送上一個祝福（網址： http://www.youtube.com/watch?v=NLOu6n427cs）
bill_mimi：肥姐，祝你身體健康，早日康復，做番個健康的開心果！
f.f:肥姐：祝你早日康復！身體健康！希望可以快啲再喺電視上聽到你嘅笑聲！
金寶湯：支持呀~見肥姐越嚟越瘦真係有啲擔心，祝肥姐早日康復！
photograph：加油呀肥姐！你仲要睇住欣宜結婚㗎！
pooh_piglet：肥姐你要努力對抗病魔呀！唔好輕易放棄自己呀！大家都好想再見倒你出show哈哈大笑~好開朗嘅樣㗎！
belibelam：好懷念以前肉騰騰嘅肥姐，更加懷念佢笑到要去廁所嘅笑聲，祝肥姐早日康復！
資料來源：香港討論區