樂基兒（Galie）昨日在跑馬地與迷你小馬合照，卻遭小馬咬裙腳，嚇煞伊人。最近有報道指她由黎明經理人接job，Galie例牌否認，跟黎明拍拖多年的她明顯受男友影響，問她是否要有骨氣時，她竟搞gag說：「打邊爐呀？」
一年一度的婦女銀袋日將於後日舉行，今次擔任頒獎嘉賓的樂基兒，昨日先到跑馬地馬場揀帽子和試造型，並與迷你小馬合照。樂基兒一走近小馬，即被牠咬着裙腳，她嚇得「嘩」一聲跳開，不過鎮定下來後，她就攬着小馬抱抱。
入馬場碰運氣
Galie揚言只是嚇一嚇，未有驚怕，她說：「覺得佢好cute，好可愛。我十幾歲時騎過馬，所以都有接觸過馬，同埋我都幾鍾意小動物，有領養過貓同狗。」Galie謂準備後天戴一頂豹紋帽迎合主題。問到她可會賭兩手？她說：「我未試過入賭場，都唔知自己賭運好唔好，玩吓都無所謂。」
昨日有報道指黎明派出自己經理人陳善之替Galie接job，如過百萬酬勞的修身堂就由陳善之拉線，黎明更連Galie拍攝廣告時的服飾和相片等，都要過問及審核。
Galie對此否認說：「唔係，報道唔知點嚟，我同以前一樣，修身堂廣告係公司安排，我有自己agency安排。」
有骨氣變打邊爐
問Galie是否不想靠男友，要有骨氣？估不到與黎明拍拖後的Galie變得愛搞gag，笑說：「打邊爐呀？」她又謂月底會到峇里出席朋友婚禮，但男友不會同行。
採訪、攝影：MaggieLaw
