布力般流浪前鋒辛達告魯斯周二退出巴拉圭嘅世界盃外圍賽大軍，理由係膝傷需動手術，估計要養傷6個禮拜。講真，我求大俠對呢位前鋒受傷一啲都唔意外，唔係佢點會叫藥煲？除咗佢，夏格維斯、波歷克都養緊傷，唔通踢過拜仁慕尼黑，都易傷啲？
辛達告魯斯今夏以平價380萬鎊（約6,000萬港元）由拜仁慕尼黑來投前，8個球季有4個球季聯賽出場數字少過20場，主要原因就係不斷受傷或因傷缺態。所以，我求大俠對於布力般肯羅致辛達告魯斯都覺得好意外，拜仁就乘機甩難喇！
辛達告魯斯唞6周
其實，辛達告魯斯喺英超開季都幾順，聯賽揭幕戰對米杜士堡就入波，跟住生日當日（8月16日）喺歐協盃對邁柏亦射入奠勝球。不過，據呢位中鋒自己透露之前都係打針頂住上陣，唔及時做手術傷勢惡化嘅話，好可能要缺陣2至3個月。
咁布力般咪好唔抵？我求大俠又覺得唔會喎。因為辛達告魯斯效力拜仁慕尼黑8個球季其間，最多1季聯賽都係入5球咁多，今季登陸英超8場聯賽已經有3球進賬（總入球為5球），所以話布力般應該企埋一邊偷笑先至真！
相比之下，曼聯用1,700萬鎊由拜仁慕尼黑羅致嘅英格蘭國腳夏格維斯，今季打得3場波就長唞就認真寃枉喇！最精明嘅就梗係拜仁慕尼黑，除咗今夏賣走辛達告魯斯同夏格維斯大賺一筆外，上季雖然畀冇晒鬥心嘅波歷克免費去車路士，最後事實證明車仔係得物冇所用。