Car通：Audi首部雙門房跑曝光<br>S5越惡越鍾意

Car通：Audi首部雙門房跑曝光
S5越惡越鍾意

德國名牌Audi繼早前推出高性能四門房跑S4之後，再下一城，推出另一部同樣擁有高性能房跑，不過今勻加入大量跑格元素，就算S5定位房車格，都配上跑車獨有嘅雙門設計，成為Audi首部雙門房跑，表現不但較S4來得更強，跟同門辣跑TT比亦唔輸蝕！

記者：梁美甜
攝影：陳偉強
模特兒：Enrica

全新首部雙門Coupe

第一眼見S5，覺得佢比S4更神氣更Sharp，事關S5頭燈係全新LED排燈設計，流露出強烈霸氣；之不過全車流線型設計，即時令S5霸氣中流露一股優雅氣質，然而最強烈震撼莫過於S5嘅雙門設計，畫龍點睛地令S5全然成為跑款房跑車格，加上車頭線條向前伸延形成V-styling嘅頭冚設計，而車身兩邊線微向上傾形成扁長側窗設計，有線條得來亦同時展現出充滿力量嘅肌肉感，令S5更具跑車爆炸感覺。
S5依樣配備S-line獨有嘅鋁合金側鏡，加上裝設有LED排式指揮燈，單係側鏡已經醒目過人，但𠵱家保留金屬色澤及外殼總係有點冷，若然能用上車身色調相信感覺會更統一更Hot。

■S5屬Audi第一部雙門房跑車。

■S5房車格局但充滿霸氣，真係越惡越得人鍾意。

■Audi有心打造S5成旗艦級跑車。

■鋁合金側鏡加有LED排燈顯示，好型！

■扁長尾燈融合車尾，感覺協調。

加速氣勢超猛

S5同樣配置咗4.2升V8FSI引擎，喺Audi引以為傲嘅quattro系統配合下，將動力以40%與60%嘅比例分配於前後輪同時，輸出354匹馬力同440Nm最大扭力，令S5擁有後驅車嘅操控感之餘，0-100km/h都只需5.1秒嘅時間，真係唔講得笑！最正加速時有貼背快感，V8FSI帶嚟嘅加速氣勢，亦非V6引擎可匹敵。S5備有手波同自動波兩款，試過今日呢架手波版，揸起上嚟無論高中低轉都感受到啲Power湧住來，長軸距同新設計18吋五輻式輪圈，添跑感外仲大大提升抓地性能同車身穩定性。

■白色S5，型格得嚟隱透高貴格調，靚女揸都唔怕變飛女。

■高性能手波車，啱晒鍾意玩扭力同追求速度感嘅車迷。

■全新設計18吋五輻式輪圈令整部S5擁有獨特運動氣息。

■掟彎抓地力及穩定性一流，超快感。

內裝豪華細緻

S5內裝比S4來得更豪，事關S4都只係喺前座部份加有碳纖飾邊，今勻S5就完全唔同，根本就係全車內裝都有，好似車門飾邊、波棍邊、中控台等，營造出豪華但又Trendy嘅Cyber感覺。Audi更不惜工本，內櫳全以黑色真皮鋪設，而電動可調校座椅同部份車門就以另外一種黑色皮革包裝。
好奇心之下，更發現S5除有MMI多媒體資訊系統之外，更裝配有Bang&Olufson高級音響設備，怪不得Audi夠膽標明「AudiSymphony」，有幾正唔使明言啦！S5係雙門2+2設計，但後座寬敞到絕對坐得人，無論高佬肥佬都好，只要入到就一定坐得到，因為雙門最大問題就係後座乘客嘅出入同上落，身形稍大又或者行動不便者絕對有難度，諗深一層，若然我大嚿兼行動不便嘅都唔會搵S5啦，係咪？