我車報員有個朋友A，日日返工都要周圍去見客，隨時一日之內走勻全香港，佢淨係每個月嘅泊車費，隨時夠佢養多部「錢七」，條數都咪話唔大；所以朋友A成日會捐窿捐罅，搵啲有咁平得咁平嘅停車場嚟泊車，其中爛地場就肯定係佢嘅首選。
哈，其實佢使乜將部車泊喺嗰啲保安同環境都麻麻嘅爛地場吖！事關好多屬政府嘅多層停車場，呢排都做緊Offer去吸引大家使用，好似中環林士街停車場咁，只要你喺星期一至六朝早7點入車，泊到夜晚7點都只係收你$150，而星期日同公眾假期朝8晚12泊足16個鐘都只係收$90，比正常每小時$20嘅收費平$230！而油麻地廟街附近嘅油麻地停車場，同埋荃灣地鐵站隔籬嘅荃灣地鐵站停車場，朝7晚7泊足12個鐘都係收$70，比正常收費每小時$16同$15，分別慳咗$122同$110，呢啲停車場有蓋又喺鬧市附近，唔使好似啲爛地場咁搞到部車要日曬雨淋，仲要停車留匙咁麻煩。
文：車報員