陳志雲主持嘅《志雲上素》噚日請咗楊思琦同森美做嘉賓，喺銅鑼灣進行錄影，之前一直有指思琦受無綫壓力，唔畀佢同男友李泳豪高調拍拖，所以俾公司雪藏。噚日三位應記者要求影合照，原本陳志雲企中間，不過佢突然轉身同思琦講：「你俾人雪咗咁耐，畀你企中間啦。」思琦即儍笑，乖乖企中間。
盼工作量增
思琦話一直都唔覺得俾公司雪藏，因為今年佢喺海外做咗好多嘢，思琦話：「好似《舞動奇跡》咁，令更多國內嘅朋友認識我，係一件好事。」佢強調公司冇唔畀佢拍拖，問思琦有乜嘢要上訴，會唔會幫男友出吓聲，等男友多啲嘢做？佢話：「冇乜好上訴，順其自然啦，如果提到咪講囉，不過我都想提議公司畀多啲嘢我做。」
陳志雲就話：「公司唔會唔畀藝人拍拖，只係想佢哋低調啲，因為怕會影響形象，俾人誤會係媾仔王就唔好啦。藝人有拖拍係好普通嘅事，思琦都冇俾人雪藏。」另外，談到沈殿霞昏迷入院，陳志雲話：「我都係剛剛收到消息，希望佢早日康復，都會嘗試聯絡吓佢身邊嘅人，了解情況。」
