噚日新鴻基地產（016）出咗新年報，最鍾意同人計身家嘅華華當然急不及待，睇吓今年新地高層邊個有人工加。結果一啲都唔意外，郭氏三兄弟中，又係三佬郭炳聯蟬聯酬金最高嘅「郭」家領導人。
黃植榮落袋最多
至於其他執行董事，就以黃植榮最高，連埋袍金、花紅同薪津，一共收咗1351萬銀，比舊年加咗7%（見表）。不過，講到加幅，就唔夠排第二嘅陳鉅源，雖然「只」收909萬銀，但整體酬金嘅加幅就有8個巴仙。睇番郭氏三兄弟，大哥炳湘薪津加花紅福利袍金合共206萬銀，加幅3%；一向都好勤力做家訪嘅二佬炳江，喺三兄弟中加得最多，加咗4.76%，不過都唔過兩球，得198萬銀。至於孻仔炳聯，酬金214萬銀，加咗3.88%。
賬面身家過300億
不過，對於郭氏兄弟嚟講，百零二百萬酬金簡直濕濕碎，股息先至係戲肉。今年新地中期加末期息，夾埋每股2.3蚊，以郭氏兄弟合共揸住10.86億股計，淨係股息都有近25億銀。嗱，呢啲係真正袋落袋嘅，仲未計賬面身家噃。近排地產股係咁升，新地就由9月頭嘅105蚊，升到噚日收市133蚊，每股升咗28蚊；以郭氏三兄弟合共持有10.86億股計，短短個零月，賬面身家多咗超過300億銀，幾百萬酬金，碎銀嚟啫！
mailto:[email protected]