陳志雲前晚為顏福偉講唱會擔任表演嘉賓，兩個同被質疑性取向的人大談感情問題，顏福偉坦承自己男女都可接受，不過較喜歡有錢女人；陳志雲則謂自己從沒談過戀愛，所以未嘗過失戀滋味，兩人的對話不用上《志雲飯局》已很精采。
顏福偉前晚在葵青劇院舉行一場「有福同享顏福偉愛多80年講唱會」，300個座位爆滿，全晚收入不扣除開支全數捐予無國界醫生，有觀眾舉起寫着「白花油」的橫額，也有觀眾上前向顏福偉獻花索簽名。
「最緊要有人錫」
整晚表演最精采要數嘉賓陳志雲上台主持「快樂飯局」的環節，當顏福偉問陳志雲最近一次失戀是何時，他坦言：「我好幸運，冇失過戀，因為我從冇戀愛過，可能我個樣似神父。」他談到如何選擇快樂時又謂：「太計較都唔會快樂，我要計較報紙雜誌嘅話，我死咗好耐，話我同鄧健泓有關，我同佢擋緊禍，都未享福，又話我同崔建邦有嘢，人哋有女友，就話我同佢阿哥有嘢。」顏福偉即說：「我前幾日先同崔建邦飲嘢，佢叫我唔好再扮攣，即係男性性取向，我冇扮，我所有嘢照單全收，總之男士女士都冇所謂，最好係女人，有錢嘅女人。」陳志雲笑說：「你都有錢。」顏福偉謂：「有錢就去紅館啦。」
後來顏福偉問到何時可上《志雲飯局》或《志雲上素》接受訪問，陳志雲說：「我只問你直定攣都可以問三個鐘，再問你直同攣嘅經驗，夾埋六個鐘呀。」二人最後合唱《講不出聲》掀起全晚高潮。
事後顏福偉接受訪問再談性取向，他直言：「男女都冇乜所謂，我個人好怕痛，怕失戀同患得患失嗰種痛，我習慣一個人，太錫自己。」問他是否可接受男人？顏福偉說：「接受到，不過女人好啲，我冇所謂，最緊要有人錫。」
「呢個年紀等收經」
顏福偉謂不愛追求過程，那被追又如何？他說：「我呢個年紀放棄咗，等收經咋。」顏福偉有經期？他說：「係呀，即係更年期，差唔多啫。」
此外，顏福偉全晚換了三套衫，幾乎全不扣鈕露胸肌，他唱至尾段時水準反覆，試過入錯拍子又走音，但觀眾都大拍手掌打氣。
採訪：李珮洳
攝影：仇志德
娛樂資料庫：或明或暗斷背山
顏福偉前晚開騷時談性向「男女都冇所謂」，其實過往都有不少藝人直接或曖昧地透露自己有同性戀傾向。
藝人：黃耀明
曾多次被拍下與外籍男友過從甚密，其歌曲《禁色》也是描述同性戀。
藝人：關錦鵬
曾勇敢公開承認是同性戀者，後來執導以同性戀為題材的電影《藍宇》，獲得多個獎項。
藝人：蘇施黃
蘇施黃接受本報專訪，被問到是否同性戀者時說：「唔係吖嘛？仲問？大家understood啦！」
藝人：張國榮
97年開騷當着歌迷向同性好友唐鶴德表白，其後更獻唱一曲《月亮代表我的心》，默認彼此關係。
資料來源：《蘋果》資料室
