木村拓哉一向都係潮人典範，衣着引嚟唔少fans跟風，近日阿Deep發現有位台灣網友，為咗擁有木村喺日劇入面嘅同款服飾，不惜一擲千金，仲將歷年來嘅戰利品放上網公諸同好。
堪稱時裝字典
呢位來自台中嘅木村迷，自稱係一名學生，基於財力有限，加上木村着過嘅同款衫都經常俾日本人猛炒，所以儲木村嘅衫代價極大，不過佢仍然好瘋狂，例如木村喺《律政英雄》入面着過嘅日本品牌HRM外套，劇中只出現過3種顏色，但呢位網友就儲齊5隻色，最貴嗰件要成9萬日圓（約6,000港元）。
另外，木村喺《冰之驕子》着過嘅Tenderloin格紋外套，以及上音樂節目時所着嘅GBSKIN皮褸，由於佢買唔起木村嗰隻色，所以另一隻色都照殺，兩件同樣喺日本拍賣網度以瘋狂炒價投返嚟。至於木村喺《美麗人生》所穿嘅白毛外套雖然係古着，但呢位網友都搜刮到一件同色同款嘅返嚟，認真有計。
其他如《戀愛世紀》嘅BAPE格仔恤、《律政英雄》嘅Danner爬山鞋等，呢位仁兄當然全部有齊，所以佢呢個網頁簡直係木村時裝字典。不過最可惜係呢位網友冇着住呢啲衫影相，唔知佢個樣會唔會好似木村咁型呢？
網址：
http://blog.yam.com/kimutaku
版主：網盜王尊尼Deep
本欄逢周一至五刊出