一提起天水圍，大家好自然會聯想到啲唔係幾好嘅新聞，難怪李克勤都憑《天水圍城》一曲，表示對嗰區嘅關注。
不過，啱啱過咗個禮拜一，世界著名大提琴家馬友友就入咗天水圍一轉，仲喺嗰度同600個小學生jam歌，應該恨死唔少名校學生。
請到馬友友入天水圍嘅，係美國運通基金，佢哋安排馬友友同一班音樂家，去天水圍香港學生輔助會小學，同600個小學生講吓音樂，用各式樂器即場jam歌。
絲路計劃其中一站
美國運通出得力搞，自然就出埋錢贊助，其實呢次活動，係馬友友同二十幾個參加絲綢之路計劃嘅音樂家喺中國之旅嘅其中一站，喺香港只演出一場。
班小學生對住呢個世界著名大提琴家，你估問啲乜嘢問題？「馬友友先生你有冇想過放棄學習音樂？」至於馬友友嘅答案係，「我常常都想呀！」仲有一條更精采，「點解冇指揮你哋都可以合奏得咁好嘅？」答案係，「音樂已經是一種最好的溝通渠道，我們藉着音樂，便能互相溝通，合奏美妙樂韻。」