過千呎+無敵海景，月租MOP5,500！
澳門近年需要大量專業人士，到澳門搞「另一頭住家」的人增加不少，於是刺激地產高潮浪接浪。不過，比起升得更狠的香港，住在澳門，原來依然物超所值。在香港一般人眼中高不可攀的無敵海景，月花幾千，就可以據為己有，再附加閒適自在，令人好不羨慕。
記者：張一豪 攝影：陳陶鈞
以前因為澳門租金便宜，據說可以以千多元租到近千呎樓，所以偶爾都聽聞會有人在澳門居住、香港返工。不過近三年澳門的樓價飛升，據當地地產經紀說，已沒聽過有人這麼「戇居」。反之，是多了一班又一班為工作，為投資而在澳門落腳的香港人。
租大屋唔算貴
澳門的租金幾年間以倍計地上升，而且每次加租，都以雙位的百分比增長，測量師阿Mike，來澳門工作差不多兩年，一直租屋居住。「近年澳門起賭場、酒店，欠缺大量有經驗的本地建築人才，所以從四方八面引進，其實唔只香港工程人員多，𠵱家澳門建築界好似聯合國一樣，加埋酒店管理人才，住屋嘅需求真係好大。因為澳門政府庫房水浸，交稅有豁免，實際稅率只係大約香港的三分一，加埋我哋過嚟都會提高40至50%人工，入面計埋房屋費，所以有更大彈性去租樓。就以我為例，喺香港，租咁樣一個兩房兩大廳成千一呎嘅樓，無可能低過$10,000，𠵱家我呢度即使加咗租，都只係MOP5,500。」澳門租地方，即使再貴，對外來人來說，還是一個合理的水平，住得過。
「筍」價買樂趣
對Mike來說，住在澳門除多了生活空間外，較悠閒的節奏，亦令他生活更加充實，「呢邊唔會咁緊張，表面好似無乜嘢玩，但係我鍾意舊嘢、品酒同聽音樂，從呢個角度睇，澳門確係一個好地方，我呢邊間屋有唔少古董家具，都係喺草堆街一帶買，價錢『筍』到你唔信。呢度酒稅亦好平，我飲開嘅酒，喺呢邊用香港嘅四、五成價錢就買得到。客廳嘅膽機，係我唯一喺香港帶過嚟嘅嘢，不過我房入面都有一套膽機，係一個澳門玩音樂嘅奇人同我整，一萬蚊左右有amp，有CD機有喇叭，好抵！呢度對我嚟講，完全唔會愁苦悶，仲可以話好有樂趣，所以我𠵱家都多數留喺呢邊，有必要先返香港。如果𠵱家嘅工程合約可以再續，持久有得做的話，我都會考慮喺澳門置業。」
買樓賺裝修
美聯地產的澳門高級營業經理Bill，來澳門工作三年，看着樓市變化。今年初，他在澳門置業。「其實好似我咁，要長期喺澳門作戰，一定係買好過租。我三年前嚟幫舊公司做開荒牛，一切都未穩定，就住宿舍，跟住做咗一段時間，發覺澳門都好有發展空間，於是就出去租屋住作長期抗戰，我喺度租咗年幾樓，就係因為加租、逼遷等搬咗4次，相當之煩。自己買嘅話，到日後真係要走，到時再賣，唔單止賺番租，當投資，都應該有賺。我𠵱家呢個580呎單位，年頭買，80萬左右，𠵱家最少都賺咗全屋裝修，大概11萬左右。我喺氹仔工作，不過就鍾意住黑沙環呢區，貪呢邊交通方便，又多嘢食，而且行10分鐘左右就到關閘，有時放假過珠海消費仲抵，生活過得唔錯。我𠵱家返香港都少咗，由初期一個月三、四次，到𠵱家除咗返去開會，即日來回，私人性質嘅話，個半月都無一次。」Bill對小記說，他在澳門的生活質素，比香港提升不少，不只有車有樓，買樓之後，十分享受財富不段增值的滿足感，還有澳門、珠海生活費都比香港低，生活上得到的，比香港更多。
兩大有潛力屋苑
香港兩家地產代理中原及美聯都早就進駐澳門，積極發展當地業務。兩家公司的地產代理均指，炒澳門樓的香港人主要是買一手樓，因為設施比舊樓完善得多，升值潛力也較大。講到心水升值屋苑，他們就有兩大推介。
寰宇天下佔地利
寰宇天下是近期最熱賣位於黑沙環的樓花，將於12月入伙。全屋苑1,019個單位，賣點是人造浪沙灘私人會所。加上附近將會是港珠澳大橋的落腳點，計劃中的澳門輕軌站，也只是兩街之隔，佔盡地利。開售時呎價約MOP1,800，上月的成交呎價已升至平均約MOP2,200至MOP2,300之間。而同區舊樓有10年樓齡、無會所的保利達花園，二手呎價約MOP2,000。業內人士估計，一年後，寰宇天下大概會再升值15%至20%。
濠庭都會罕有大單位
濠庭都會是氹仔罕有設會所的大型屋苑，單位由1,050呎至最大的2,550呎。當中以2,550呎升值潛力最高，因為澳門政府已限制興建2,000呎以上的單位，所以大單位會越來越罕有，現在一個最大單位約售MOP650萬，約MOP2,900呎，而即將發售的第13座，有傳目標呎價會調高至MOP3,200，預計整個屋苑的售價將會大大提高。
