周國賢去年開始放棄個人歌手身份，重組舊樂隊Zarahn，搞足成年音樂之後，終於喺上月底推出樂隊EP，呢個嘔心瀝血作品推出後，周國賢都暫時鬆番口氣，可以同韓籍太太李美英sweet吓，早排兩公婆仲拍拖遊車河，唔知幾咁恩愛。
今年娛樂圈喜事重重，唔少藝人結婚生仔，27歲嘅周國賢已經有個5歲大嘅囡囡Clara，不過周太肚仔凸凸、腰肢圓潤、塊面仲脹卜卜，難免令人懷疑佢有身孕。
齋買朱古力
嗰晚8點零鐘，戴冷帽嘅周國賢揸住佢部落地1年、價值40萬嘅凌志房車，載太太去到數碼港商場，當時佢停車喺路邊，戴cap帽同着長身T恤嘅周太就落車，一個人行入百佳超級市場買嘢食，甚少曝光嘅周太微微發福，腹部仲有些少隆起，見佢一入超市就行去擺朱古力嘅貨架，揀咗一袋約價21蚊嘅吉百利朱古力，跟住就即刻畀錢，行番上車會合老公齊返貝沙灣愛巢。
周太腰圓肚凸惹大肚疑雲，早幾日周國賢就透過所屬嘅華納唱片宣傳部否認太太懷孕，佢話：「我老婆唔係大肚，肥咗少少咋，咁要減肥啦！不過我個女都大啦，我都有意思追多個小朋友嘅。」
