根據一個網上非正式統計，越後生靚女，炒股成績越好。嗱，有根有據㗎，網友Comicparty就有深切體會，「啲男同事為咗向靚女獻殷勤，會介紹啲最穩陣贏錢嘅股票畀佢哋，啲女仔收收埋埋啲消息，想唔贏大錢都難。所以話炒股贏幾多錢，同你實際識幾多嘢，係冇必然關係。」聽佢語氣，相信應該收唔到乜嘢好料。
Big_Joe_B就同華華一樣咁挑通眼眉嘞，「不嬲靚女都係有天生嘅優勢㗎啦，平常心睇好啲，咪靠自己囉，呢個世界邊有咁多唔抵得，做好自己好過啦。」Girorowai就認為：「靠人哋嘅消息炒股贏錢，總有一日會將賺番嚟嘅錢全部歸還。」其實肯做功課，炒股嘅贏面就大啲，使乜吓吓靠人啫。
收風易 長揸穩陣股
小慧美子話：「唔使靠出賣自己姿色嚟換貼士，靠自己至證明你係個高尚嘅人！」都唔使講到咁激，好多靚女都係靠自己本事賺錢。
Oletowin就話：「家陣好多女人炒股比男人賺得多，係因為女人寧願買穩陣藍籌，睇長線；男人較勇，鍾意短炒，買輪同細價股，咪容易蝕錢囉！」