睇見張耀堂同梁永祥兩個喺銀行界做到咁有成績，查實今時今日喺銀行打工，仲係咪咁好做？喺《香港討論區》，銀行界網友就似乎唔係咁睇，佢話成日見銀行招聘廣告拍到啲人咁開心，同現實相反，仲話如果真係做得咁開心，銀行就唔使成日登廣告請人。咁又係，入面唔好做啲人先走，先要請人啫！
SaSa314仲講到好似俾人呃咗咁，「初初以為喺銀行做好，人工OK福利好，假多工作又定時……點知工作壓力極大，成日驚做錯嘢，工作排山倒海咁嚟，晚晚做到好夜，星期六假期照返足成日，都清唔晒啲嘢。」
kennisngwy都覺得唔開心，「時間太長，照顧唔到屋企，一個人做幾個位嘅嘢，嚴重缺人，仲要俾客日鬧夜鬧，好冇歸屬感。」唔少網友都話家陣啲客難服侍。
不過，銀行工係咪真係咁難打，rman595就話要睇吓係男生定女生，「糧期準，（銀行）唔會執！工作斯文，有冷氣嘆！極適合女生嘅工作。」kelvinyhc就代表男生話：「男生喺銀行做，一般被認為野心大，若然係backoffice嘅工作又比較悶。」