前日華華先講過，滙豐連續8年成為公益金籌款最多嘅企業；噚日佢哋又攞獎，今勻係美商會選咗獅子行做「最善待女僱員公司」，三日抱兩「獎」，唔知佢哋位香港一姐、總經理兼工商業務環球聯席主管梁高美懿，會唔會出錢搞吓慶功呢呵？
連卡佛專家教扮靚
華華問過啲評判，佢哋話揀滙豐，係因為銀行承諾會維持有女僱員坐高層個位；仲話呢個做法，令滙豐由香港一間本地銀行，變成環球企業喎。講到咁大咁重要，勝出嘅禮物當然唔小嘢──除咗一個Tiffany送出嘅水晶獎狀，最重要又最實用嘅，就係搵到連卡佛專招呼千金或闊太嘅PersonalStylists，教40位滙豐女職員點扮靚，返工同去玩嘅唔同形象同扮靚方法。
滙豐發言人話，呢次得獎佢哋固然開心又興奮，尤其啲獎品好啱使，有女同事聽到話連卡佛教扮靚，已經好興奮；不過，佢哋仲度緊究竟點分配嗰40個名額，斷估都應該係搞個活動或者遊戲，贏咗至有份，總之要公平公正咁揀人。
華華睇番佢哋嘅資料，上年嘅資深管理層當中，有17%係女性，而中級管理層都有三成，咁個活動肯定爭崩頭喇。