賓架Ｗ間銀行搞投資講座，在大酒店宴會廳舉行。嘩，適值股市空前暢旺，參加者非常踴躍，律師Ｔ睇到廣告之後打電話去攞飛，已經爆晒棚。律師Ｔ竟然打電話問左丁山：「喂，你同賓架Ｗ好熟，你幫我撲張飛得唔得？」使唔使咁緊張呀，唔通聽完一定攞到實賺貼士咩。左丁山唔想令賓架Ｗ難做，勸律師Ｔ唔好去。
佢唔去啫，左丁山就去學嘢，只見全場客滿，企位者數十人，九龍香格里拉酒店大宴會廳逼到水洩不通，聽Ｓ老師與Ｈ主持對談，兼夾窩輪天后Ｌ講窩輪。Ｈ主持見到前排貴賓中，赫然有大基金經理Ｌ在座，有啲驚噃，對基金Ｌ講：「不如你上去講啦！」基金Ｌ笑笑口話：「講笑咩，我嚟聽嘢啫，完全冇準備。」
基金Ｌ星期一早上去上海，星期五中午回港，習以為常，佢老早睇中中國市場，幾年前就放低香港日常投資業務，到上海耕耘，卒之與內地銀行合資組織咗一個基金，開辦未夠兩年，現在有幾多錢呢？基金Ｌ話：「少少哋，有五百億元人民幣啦，資產超過二千億元嘅中國基金公司有幾間大我哋好多。我喺香港幾十年，未見過咁多錢，中國令我每日都大開眼界，投資規模之大，歷史上未見過，將來中國基金業可以追上美國，𠵱家內地人做到基金經理嘅，人人賺到笑，收入之高，超過香港同業。」
換言之，睇中國未來，就一定要買股票。睇歷史數據，目前股市高處不勝寒，唔到你唔驚。好友係未來前景派，淡友係歷史數據派，目前好友佔盡上風。
星期日到馬場，見到退休警官Ｃ。佢已經唔到馬場多年，今次特登入場，只係為咗卜定張枱俾老婆喺十月十四日（婦女銀袋日）入場，第一場未跑，佢已經鬆人。退休警官Ｃ話：「呢幾年刨窩輪多過睇馬，對馬已經失晒興趣。」咦，即係暗示窩輪為佢搵到食噃？問佢賺咗幾多？佢話：「好彩夠運食到個浪，退休三年，炒窩輪搵錢多過以前打工好多，如果到今年先至退休，就走晒大雞咯。但我認為牛市已經進入第五浪，特徵係大起大跌，炒窩輪可以賺到笑，可以蝕到暈，風險咁大，我已經退出窩輪市場咯，淨係買滙豐啫。」