小妹最鍾意食大閘蟹，越接近重陽，啲大閘蟹越肥美，日日係咁食，食到小妹都有啲膩，想停一停。點知噚日收到大閘蟹專門店華興行老友Stephen嘅電郵，佢話佢哋啱啱引入咗全港首批嘅陽澄湖有機蟹，亦都係香港第一次有機大閘蟹賣。吓，潮流興有機，乜啲蟹都有有機蟹？
肉質蟹膏更鮮甜
小妹第一時間CallStephen問吓。佢話老闆近年專登喺陽澄湖養殖有機蟹，整個養殖生產過程按照國家無公害水產品生產標準，採用鮮活小魚、小蝦、螺螄做天然飼料，唔同其他人用魚糧、蟹糧嘅化學肥，今年呢批大閘蟹獲國家頒發有機產品認證。Stephen話，同樣係陽澄湖蟹，有機蟹嘅肉質、蟹膏比一般蟹鮮甜。不過，價錢就比普通陽澄湖大閘蟹貴兩成，約六両重每隻售140蚊，半籮24隻計售2,000蚊。Stephen仲話得個講字冇用嘅，約小妹試吓啲有機大閘蟹。咁大個女都未試過有機大閘蟹，唔食點知係龍定係蟲。有興趣買嘅朋友，不妨致電28381688問吓。
逢周一至周四刊出