呢個世界原來真係好細，點解華華咁講？故事係咁樣開始嘅──華華之前同賓架L傾偈，風花雪月之際，佢忽然話：「講你都唔信，我前排喺個賓架聚會度，撞番幾十年無見嘅舊街坊C，佢伯爺同我伯爺以前係同事，估唔到幾十年後，我哋兩個做埋行家……」
咁有緣份，大家估唔估到，華華所講嗰兩位係邊個？咪就係恒生銀行（011）梁永祥，同星展嘅張耀堂囉！話說佢哋嘅伯爺，當年都喺香港小輪（050）打工，大家住喺大角嘴員工宿舍，雖則唔係同一幢樓，但街坊街里，兩個時不時都會碰面。之後各散東西，花開花落，一散就幾十年。
話說佢哋重聚嗰日，情景都相當搞鬼，梁永祥話：「我做信用卡嗰陣，周不時都會搞啲聚會，等行家交流吓。有次見到張耀堂，佢個babyface十幾年都冇變，咁咪行埋去『盤』吓佢，我哋就喺咁嘅情況下相認。」
相認全憑babyface
將單嘢問番張耀堂，佢笑笑口話：「我個樣就冇乜變過，但佢就變晒，我都唔記得細個有冇真係撞過佢，有冇同佢玩過？」人家話盤你噃，點盤啫？「當時梁永祥係信用卡業務嘅老行尊，佢突然行埋嚟同我講：『你以前係咪住喺大角嘴XX樓？你以前係咪成日喺XX球場玩？你伯爺係咪做小輪？』」
雖然細個有冇同梁永祥一齊玩，張耀堂唔多記得，但佢哋細個有一個共同喜好，就係夾啱時間，坐老竇當更嘅免費船。仲有一樣共通點，就係兩個學識游水，都係因為跟老竇出得海多，成日被人丟落海，焗住學。
張耀堂同華華講，細個家境唔好，冇乜娛樂，除咗落去屋村個空地玩，最鍾意就係坐船，「老竇當年行大澳條線，通常一日得兩班，一早一晚，我咪跟埋去，有得玩有得食，真係開心到不得了呀！」
兩個小輪伯爺，生咗兩個銀行賓架，大家係咪覺得好似睇咗輯《獅子山下》呢？
mailto:[email protected]
張耀堂簡歷
現任：星展香港零售銀行業務總監
01年：道亨被新加坡發展銀行（DBS）收購，改名星展銀行（香港），張氏為星展要員之一
99年：11月離開做咗26年嘅花旗，過檔道亨銀行（現星展銀行），出任零售銀行總經理
89年：花旗有意在港開拓信用卡業務，轉到信用卡部門工作，不到5年升為信用卡部門總經理
73年：19歲，入花旗銀行（前稱萬國寶通銀行）持有嘅遠東銀行做櫃員，3年後升分行會計；之後遠東銀行同花旗分家，派到花旗擔任行政經理
梁永祥簡歷
現任：恒生銀行總經理（個人理財及財富管理業務）
00年：5月升做副總經理（零售銀行業務）
99年：睇埋零售銀行業務策劃及發展
95年：加入恒生做助理總經理，主管該行信用卡業務
78年：浸會學院英文系畢業後，即被運通羅致做部門主管，之後曾經喺威士國際組織同萬事達卡國際組織出任要職
70年代：學生時每日到美國運通銀行做兼職，幫商戶核對消費者信用卡資料，註定佢日後做呢行