家吓做生意，唔單止舖位要靚，個朵要響，仲要因時制宜，搞搞新意思，最好就係有啲數據support，同經濟掛鈎，咁就吸引華華行家報道、讀者關心。
就好似兩間強攻中國嘅美式快餐店，麥當勞同必勝客咁，先後整咗個麥當勞指數，同必勝客指數，一於係人有我有。
同麥當勞指數一樣，必勝客指數都係反映當地生活水準，之不過，前者個規模大好多，後者雖則暫時只係限於長江三角洲嘅廿個城市，但就係中國第一個企業經營指數。
中國首個企業經營指數
據華華所知，個指數係以必勝客嘅店舖數目、營業額，同埋業績增長潛力等資料計出嚟，噚日仲第一次公佈結果，由物價高漲嘅上海排頭位，指數有89.97；其次係杭州、寧波、蘇州同埋南京。必勝客話，個指數以後每年會公佈一次，今次小試牛刀，之後會慢慢將地域擴大到全中國咁話。