日本萬人迷木村拓哉上星期飛咗去韓國宣傳電影《律政英雄》,雖然唔少傳媒都話佢今次表現得好親民,唔似得嚟香港嗰時黑口黑面。
恍如精神病人
不過,韓國網友似乎對佢冇乜好感,話佢抵埗時嘅衣着似露宿者、癲佬或者係扮尊尼狄普(JohnnyDepp)。
韓國搜尋網Daum近日有唔少關於木村嘅討論,不過彈多過讚。好似網友esnyder講到佢落機時嘅衣着話:「有冇人可以講解吓木村點解將件衫紮喺腰度?如果韓國男仔咁着,一定俾人捉去精神病院。」HORRING仲話:「木村同尊尼點樣惺惺相惜都好,佢唔好由頭到腳都跟足尊尼啦!」
「真人咁鬼老」
雖然木村去到宣傳新片嘅記者會時,已經由頭再執過,但韓國網友依然繼續狠批,sorang28:「電影海報同真人有好大年齡差別喎,真人咁鬼老。」
teayong同唔少人就話,覺得客串嘅李秉憲比木村更靚仔。當中網友OIKU仲話:「木村先生,你同我哋嘅憲哥身高……真係矮啦。」阿Deep睇過討論後,完全感受到韓國人熱愛自己民族嘅精神,同埋對日本人嘅仇恨,真係唔知要讚定彈佢哋好。
木村落機討論網址: http://news.empas.com/board/bbs/read.html?b=star&a=168004
記者會討論網址: http://news.empas.com/board/bbs/read.html?b=abroad&a=101088
版主:網盜王尊尼Deep
本欄逢周一至五刊出